Euro 2020

५३ वर्ष पछि पुरा भयो अज्जुरीको सपना, इटाली युरो च्याम्पियन

Published

on

टाइ-ब्रेकरमा इङ्ल्याण्डलाई ३-२ ले पराजित गर्दै इटालीले ५३ वर्ष युरो च्याम्पियन्शिपको उपाधि उचालेको छ । अन्तिम पटक १९६८ मा इटालीमै भएको युरो इटालीले जितेको थियो ।

इटालीका लागि अन्द्रे बेलोट्टी र जर्जिन्हो पेनाल्टी चुकाउन पुगेका थिए । तर, पछि इङ्ल्याण्डका लागि मार्कस रासफर्ड र जेडेन सान्चो र बुकायो साका पनि पेनाल्टीमा चुक्दा इङ्ल्याण्ड ईतिहास बनाउनबाट चुकेको थियो ।

खेलमा इङ्ल्याण्डका लागि दोस्रो मिनेटमै लुक श ले गोल गरे पनि दोस्रो हाफमा इटालीका लागि लियोनार्दो बोनुचीले गोल गरे पछि खेल एक्स्ट्रा टाइममा गएको थियो ।

खेलको दोस्रो मिनेटमा नै इंग्ल्यान्डले लुक श को गोलमा अग्रता लिएको थियो । काउन्टर अट्याकमा दायाँ विंगबाट काइरान ट्रीपिएरले दिएको क्रसलाई शाले बायाँ भागबाट हाफ भलीमा गोल गरेका थिए ।

पहिलो हाफ इङ्ल्याण्डले इटालीको खेललाई चल्न पनि दिएको थिएन । इटालीले कुनै पनि प्रहार पोस्टमा राख्न नसकेको पहिलो हाफमा कुनै खेलाडीले मुभ बनाउन सकेको थिएन ।

दोस्रो हाफमा भने इटालीले बिस्तारै लय समाएको छ । ६२ औँ मिनेटको फेड्रिको किएजाको प्राहरमा पिकफर्डले बचाएका थिए । तर, ६७ औँ मिनेटमा इटालीले बराबरी गोल फर्काएको थियो । कर्नरबाट आएको बलमा चिलिनीले गरेको हेडरमा डिफेन्स गर्न नसकेको इङ्ल्याण्डलाई बोनुचीले गोल गराएका थिए ।

त्यस पछि इटालीले १० सटहरु प्रहार गरे पनि पोस्टमा भने राख्न सकेको थिएन तर पनि खेल एक्स्ट्रा टाइममा पुर्याउन इटाली सफल भयो ।

९६ औँ मिनेटमा इङ्ल्याण्डले अर्को मौका गुमायो । स्टेर्लिङ मौकामा चुक्न पुगेका थिए । इटालीले एक्स्ट्रा टाइमको पहिलो हाफको १०३ औँ मिनेटमा एमरसनको क्रसलाई गोलरक्षक पिकफर्डले बचाएका थिए ।

दोस्रो हाफमा पनि पिकफर्ड इटालीका लागि वाधक बने । १०६ औँ मिनेटमा फेड्रिको बेनर्डेसचीले प्रहार गरेको फ्रिकिकलाई उनले बचाएका थिए । त्यस पछि १०८ औँ मिनेटमा इङ्ल्याण्डको मुभलाई गियन्लुगी डोन्नरुमाले बचाएका थिए । त्यस पछिका लगातारको आक्रमणहरु इङ्ल्याण्ड चुकेको थियो ।

Click to comment

Trending