बिश्वकप बिजेता फ्रान्सलाई स्तब्ध पार्दै ६७ बर्ष यता कुनै पनि प्रमुख फुटबल प्रतियोगिताको क्वार्टर फाइनल प्रवेश गरेको स्विट्जरल्याण्ड युरो कपमा अर्को इतिहासका लागि शुक्रबार स्पेनको सामना गर्दैछ ।
भ्लादिमिर पेट्कोभिचको टोलीले एक पेनाल्टी मिस गरेपनि दुई गोलले पछि परेको स्थितिबाट सनसनीपूर्ण पुनरागमन गर्दै फ्रान्सलाई पेनाल्टी सुट आउटमा हराउन सफल भएको थियो । यस क्रममा फ्रान्सको २०१८ बिश्वकपका हिरो किलियन एमबाप्पेले पेनाल्टी मिस गरेका थिए ।
स्विस टोली अब भने सुस्त शुरुवात गरेपनि अन्तिम दुई खेलमा १० गोल गरेको स्पेनलाई हराउदै अर्को सरप्राइज दिन चाहन्छ ।
अल्भारो मोराटाले आलोचनालाई शान्त गर्दै गरेको गोलमा स्पेनले क्रोएसियालाई अतिरिक्त समयमा ५-३ ले पराजित गरेको थियो तर अब उसले किर्तिमानी चौथो पटक युरोपियन उपाधि जित्ने हो भने धेरै गल्तिहरु सुधार्नु पर्ने देखिन्छ ।
मोराटाले समुह चरणमा लगातार अवसरहरु गुमाउदा युभेन्टस फर्वार्ड र उनको परिवारलाई सेभिलमा समर्थकहरुले नै ज्यान मार्ने धम्की दिएका थिए ।
इतिहास पूर्ण रुपमा स्पेनको पक्षमा रहेको छ । स्विट्जरल्याण्डसंग भएको २२ खेलमा मात्र एकमा पराजय व्यहोर्दा स्पेनले २०१० मा दक्षिण अफ्रिकामा बिश्वकप उपाधि नै जितेको थियो ।
वर्तमान स्पेन टोलीमा कप्तान सर्जियो बुस्केट्स बिश्वकप बिजतो टोलीबाट एक मात्र रहेका छन् भने उनी र जोर्डी अलबा २०१२ को युरो कप जित्ने टिमबाट बांकी रहेका सदस्य हुन् ।
अन्तिम १६ मा क्रोएसियामाथि प्राप्त जित स्पेनको लागि २०१२ मा इटालीलाई ४-० ले पराजित गरेपछि कुनै पनि प्रमुख प्रतियोगितामा हात लागेको पहिलो नकआउट बिजय हो ।
स्विट्जरल्याण्ड पछिल्लो पटक कुनै पनि प्रमुख प्रतियोगिताको क्वार्टर फाइनलमा सन् १९५४ को बिश्वकपमा पुगेको थियो । आयोजक स्विट्जरल्याण्ड क्वार्टर फाइनलमा अष्ट्रियासंग ७-५ ले हारेको थियो । यो नै बिश्वकप इतिहासको सबैभन्दा हाइ स्कोरिंग गेम हो ।
साढे ६ दशक भन्दा बढीको समयमा स्विट्जरल्याण्ड पहिलो पटक सेमिफाइनलको नजिक रहेको स्थितिमा सारिएभोमा जन्मिएका प्रशिक्षक पेट्कोभिच स्विस टिमको समावेशी टोलीको प्रतीकको रुपमा रहेका छन् ।
फ्रान्सबिरुद्धको खेल समाप्त भएपछि म केही पनि बोल्न सकिरहेको थिइन । मेरो मुखबाट आवाज नै निक्लिएन, २०१४ मा नियुक्त भएका पुर्व सामाजिक कार्यकर्ता पेट्कोभिचले भने ।
तर पेट्कोभिचलाई चुनौति छ । फ्रान्ससंगको खेलमा पहेलो कार्ड पाएका प्रभावशाली आर्सनल मिडफिल्डर ग्रानित जाका स्पेनबिरुद्धको खेलमा हुने छैनन् । जाकाकै उत्कृष्ट थ्रु बलमा मारिया गाभ्रानोभिचले ९० औं मिनेटमा गोल गर्दै खेललाई अतिरिक्त समयमा धकेलेका थिए ।
