स्पेनको अदालतले युरोपियन फुटबलको सर्वोच्च निकाय युएफालाई युरोपियन सुपर लिग (ईएसएल) मा आबद्ध भएका क्लबहरू रियल म्याड्रिड, बार्सिलोना र युभेन्टस विरुद्धको सबै मुद्दा फिर्ता लिन आदेश दिएको छ ।
म्याड्रिड व्यवसायिक अदालतले बिहीबार आफ्नो फैसला सुनाउँदै युएफालाई तीन क्लब विरुद्ध कुनै पनि कारबाही अगाडि नबढाउन पनि निर्देशन दिएको छ । त्यस्तै उसले युएफ़ाले सुपर लिग आयोजना गर्ने क्लबहरूको निर्णय विरुद्धमा दबाब दिन र जबरजस्ती पनि गर्न नमिल्ने जनाएको छ । त्यस्तै अदालतले बिभिन्न क्लबहरूलाई युएफाले लगाउने भनिएको एक सय मिलियन युरो जरिवाना लगाउने निर्णय उल्टाउन भनेको छ ।
अदालतले इंग्ल्यान्डको प्रिमियर लिग तर इटालीको फुटबल संघलाई उनीहरूसँग आबद्ध भएका सबै क्लबहरू विरुद्धको निर्णयहरू पनि सबै छाड्न भनेको छ ।
१२ संस्थापक क्लब सहित स्थापना हुँदै गरेको युरोपियन सुपर लिगको धेरै विरोध भए पछि नौं क्लबले ७२ घण्टा पनि बित्न नपाउँदै आफ्नो नाम फिर्ता लिएका थिए । संस्थापक क्लबका रुपमा रहेका प्रिमियर लिगका म्यानचेस्टर सिटी, चेल्सी, म्यानचेस्टर युनाइटेड, आर्सनल, टोटनह्याम र लिभरपुल, ला लिगाको एट्लेटिको म्याड्रिड र सिरी आ को इन्टर मिलानले आफ्नो नाम फिर्ता लिने बताए पनि रियल, बार्सिलोना र युभेन्टसले भने तत्कालका लागि स्थगित भए पनि भविष्यमा आयोजना गर्ने जनाउँदै आएका थिए ।
युएफाले यस अघि रियल, बार्सिलोना र युभेन्टसलाई आफ्नो निर्णय स्थगित नगरेको खण्डमा दुई वर्ष सम्मको प्रतिबन्ध लगाउने धम्की दिँदै आएको थियो ।