क्रिस पउल आफ्नो १६ बर्षे एनबिए करिअरमा पहिलो पटक फाइनल खेल्ने तयारीमा देखिन्थे तर उनको प्रदर्शनले अब भने फिनिक्स सन्सलाई इतिहासकै पहिलोउपाधि नजिक पुर्याएको छ ।
वेष्टर्न कन्फेरेन्सको गेम सिक्समा लस एन्जलस क्लिपर्सलाई १३०-१०३ ले पराजित गर्दै सन्स १९९३ पछि पहिलो पटक फाइनलमा प्रवेश गर्यो । एक दशक प्लेअफमा पुग्न असफल हुदै फाइनल पुग्ने पनि सन्स पहिलो टोली बनेको छ ।
फाइनलमा अब सन्सले इस्टर्न कन्फेरेन्स फाइनल्सको बिजेतासंग खेल्नेछ । इस्टर्न कन्फेरेन्स फाइनल्समा अहिले एट्लान्टा हक्स र मिलवाउकी बक्स २-२ को बराबरीमा रहेका छन् । फाइनल जुन टिम पुगेपनि सन्सलाई होम कोर्टको फाइदा भने रहनेछ ।
सन्सको पुनरागमन जितमा पउलको प्रदर्शन प्रमुख रह्यो । उनको ४१ पोइन्टको प्रदर्शनमा आठ असिस्ट, चार रिबाउन्ड र तीन स्टिल रहेको थियो । पहिलो हाफ आफ्नो पक्षमा पारेको सन्सले ९ अंकको अग्रता लिएको थियो । त्यसलाई उसले तेश्रो क्वार्टरको अन्त्यसम्ममा १७ अंकमा लम्ब्याएको थियो ।
तर क्लिपर्स खेलमा फर्कदै त्यसलाई ७ अंकसम्म भार्न सफल भएको थियो । तर पउलले ८ अंक स्कोर गर्दै क्लिपर्सलाई रोकेपछि सन्सको अग्रता २८ अंक भएपछि खेल सन्सको पकडमा आएको थियो ।
प्रमुख खेलाडी कवाही लेनर्डसंगै सेन्दर सर्ज इबाका र इभिका जुबाकलाई गेम सिक्सको लागि गुमाएको क्लिपर्सका लागि मार्कस मोरिस सिनियरले सर्वाधिक २६ अंक र ९ रिबाउण्डको प्रदर्शन गरेका थिए । पउल जर्ज २१ अंकमै सिमित भएका थिए ।
