फ्रेञ्च स्टार स्ट्राइकर किलियन एमबाप्पेले स्विट्जरल्याण्डबिरुद्धको सनसनीपूर्ण युरो कप अन्तिम १६ को खेलमा निर्णायक पेनाल्टीमा गोल गर्न चुकेपछि सामाजिक सञ्जालमार्फत माफी मागेका छन् ।
उतार चढावपूर्ण खेलमा फ्रान्सले पहिलो पुनरागमन गर्दै पेनाल्टी बचाउनुका साथै ३(१ को अग्रताका साथ खेल आफ्नो पक्षमा पारिसकेको थियो । तर स्विट्जरल्याण्डले ९ मिनेटमा दुई गोल गर्दै खेललाई अतिरिक्त समय र टाइब्रेकरमा धकेलेको थियो ।
स्विट्जरल्याण्डको तेश्रो गोल ग्रानित जाकाको उत्कृष्ट असिस्टमा मारियो गाभ्रानोभिचले ९० औं मिनेटमा गरेका थिए । अतिरिक्त समयमा फ्रान्सले केही अवसरहरु गुमाएपछि खेल पेनाल्टी सुटआउटमा धकेलिएको थियो ।
निकै प्रतिस्पर्धात्मक रहेको पेनाल्टी सुटआउटमा स्विट्जरल्याण्डका पांचै खेलाडीले गोल गर्दा फ्रान्सका लागि एमबाप्पेले पाचौं तथा निर्णायक प्रहार गर्न आएका थिए । तर फ्रान्सलाई २०१८ को बिश्वकप जिताउन प्रमुख भुमिका खेलेका एमबाप्पेको प्रहारलाई स्विस गोलकिपर यान सोमरले डाइभ गर्दै बचाएपछि डिडएर डेसच्याम्प्सको टोली स्तब्ध हुदै घर फर्किएको थियो ।
आफू चुकेपछि केही बेरसम्म निराश भएर उभिएका एमबाप्पेले खेलपछि ट्विटर र इन्स्टाग्राम मार्फत माफी मागेका छन् । निकै मार्मिक सन्देश दिएका एमबाप्पेलाई लिएर समर्थकहरुले पनि साथ दिएका छन् ।
“प्रतियोगिताबाट बाहिरिनु पर्दा निकै दुख लागेको छ । हामी आफ्नो लक्ष्य पुरा गर्न असफल भयौं । म यो पेनाल्टीको लागि माफी माग्न चाहन्छु । म टिमलाई मद्दत गर्न चाहन्थे तर म फेल भए । सुत्न अब सहज हुने छैन तर दुर्भाग्य खेलको यही उतार चढावलाई नै म निकै माया गर्छु,” एमबाप्पेले लेखेका छन् ।
“मलाई थाहा छ मैले तपाई समर्थकहरुलाई निराश बनाएको छु । तैपनि म तपाईहरुले दिदै आएको समर्थन र हामी प्रतिको बिश्वासका लागि धन्यवाद भन्न चाहन्छु । सबैभन्दा महत्वपूर्ण कुरा यसबाट आफूलाई सम्हाल्दै भविष्यमा अझै सशक्त भएर आउनु हो,” उनले भनेका छन् ।