३-१ को अग्रता जोगाउन नसक्दा स्पेनले क्रोएसियासँग एक्स्ट्रा टाइम खेल्नु पर्ने भएको छ । पाब्लो सराबिया, सेजर एज्पिलिक्वेटा र फेरान टोरेसले स्पेनका लागि एक-एक गोल गर्दा क्रोएसियाका लागि स्पेनका पेद्री गोन्जालेजले ‘ओन गोल’ गर्दा अर्को गोल मिस्लाभ ओर्सीच र मारियो पासालिचले गरेका थिए ।
स्पेनले खेलमा धेरै पोजिसनमा आफ्नो पकड बनाएको थियो । तर, २० औँ मिनेटमा आफ्नै गल्तीले स्पेनले गोल खान पुगेको थियो । पेद्रीले दिएको पासलाई स्पेनका गोलरक्षक उनाइ सिमोनले नियाल्न नसक्दा गोल खान पुगेको थियो । पहिलो गोल गरे पछि क्रोएसियाले केही मौकाहरु पनि बनाएको थियो । २७ औँ मिनेटमा क्रोएसियाका लागि मटियो कोभाचिचले गरेको प्रहार बहिरिएको थियो ।
स्पेनले ३८ औँ मिनेटमा भने बराबरी गोल फर्काउन सफल भएका थियो । डिबक्स भित्र लुइस गयाको प्रहार बचाउ गरे पनि रिबाउन्डमा पाब्लो सराबियाले गोल गरेका थिए ।
दोस्रो हाफमा स्पेन अझै आक्रमक देखिएको थियो । स्पेनले लगतार बनाएको मुभ ५७ औँ मिनेटमा सफल बन्न पुगेको थियो । फेरान टोरेसले दिएको क्रसमा सेजर एज्पिलिक्वेटा हेडर गोल गरेका थिए । स्पेनले तेस्रो गोल ७६ औँ मिनेटमा गरेका थिए । पाउ टोरेजले दिएको लामो बलमा क्रोएसियाका डिफेन्डरको गल्तीको फाईदा उठाउँदै फेरान टोरेसले गोल गरेका थिए ।
तर, ८५ औँ मिनेटमा क्रोएसियाले दोस्रो गोल गर्यो । लुका मोड्रिचले मिलाएको पासमा मिस्लाभ ओर्सीचले गोल गरेका थिए । ९० मिनेट पछि थपिएको इन्जुरी समयमा क्रोएसियाले दमदार खेलेको थियो । इन्जुरी समयको दोस्रो मिनेटमा मै मारियो पासालिचले हेडर गोल गर्दै क्रोएसियाको सम्भावनालाई जिवित राखेका छन् ।
अब दुई टोलीले क्वार्टरफाइनल स्थानका लागि एक्स्ट्रा टाइम खेल्दै छन् ।
