स्पेनिस ला लिगाका अध्यक्ष जाभियर टेबासले यदि बार्सिलोनाले स्टार खेलाडी लियोनल मेस्सीलाई क्लबमा राख्ने हो भने सन् २०२१-२२ को सिजनका लागि अन्य ठाउको लगानीमा कटौती गर्न पर्ने बताएका छन् ।
मेस्सीको बार्सिलोनासँगको सम्झौता यसै सिजनको अन्त्य सँगै सकिएको छ । मेस्सी र बार्सिलोना दुवैले नयाँ सम्झौताको बारेमा केही खुलाएका छैनन् भने यस विषय सबैको चासो बन्दै गएको छ ।
यसै वर्षको सुरुवातमा क्याटलन क्लबले कोरोनाका कारण टिकटबाट आउने रकममा कमी आएका भन्दै आफ्नो ऋण एक बिलियन युरो पुगेको जनाएको थियो । त्यसैले पनि क्लबलाई टाँट पल्टिन नदिनका लागि भए भने टेबासले मेस्सीलाई क्लबमा राख्नको लागि बार्सिलोनाले आफ्नो टोलीको नै तलबमा कटौती गर्न पर्ने पनि बताए ।
मेस्सीले यस अघि चार वर्षको सम्झौता स्वरुप बार्सिलोनाबाट पाँच सय ५५ युरो बुझेका थिए । टेबासले बार्सिलोनाले ३३ वर्षीय मेस्सीको लागि त्यति ठुलो रकम खर्च गर्नका लागि अन्य स्थानमा गर्दै आएको लगानी र तलब कटौती गर्नु आवस्यक रहेको बताएका हुन् ।
‘बार्सिलोनाले तलबमा खर्च गर्न पाउने रकम भन्दा धेरै खर्च गरिसक्यो । आशा छ उनीहरूले मेस्सीलाई बार्सिलोनामा नै राख्न सफल हुन्छन् होला । तर त्यसका लागि उनीहरूले अन्यत्रको खर्चमा भने भारी कटौती गर्न पर्नेछ,’ टेबासले भने ।
‘हामी उनीहरूले गर्न पाउने खर्चका बारेमा लचिलो बन्न सक्दैनौ । चाहे त्यो मेस्सीको लागि नै किन नहोस, कुनै पनि नियममा परिवर्तन हुँदैन ।’
ला लिगाको कुल घाटा सात सय मिलियन युरो हुँदा बार्सिलोना एक्लैको आधा जस्तो रहेको छ ।
