घरेलु टोली वेस्ट इन्डिज विरुद्धको दोश्रो तथा अन्तिम टेस्टमा १५८ रनको फराकिलो जित निकाल्दै दक्षिण अफ्रिकाले शृंखला माथि क्लिन स्विप गरेको छ । पहिलो टेस्टमा एक पारी र ६३ रनको जित निकालेको दक्षिण अफ्रिकाले शृंखला २-० ले आफ्नो पक्षमा पारेको हो ।
जितका लागि ३२४ रनको लक्ष्य सहित ब्याटिङमा आएको वेस्ट इन्डिजले ५८ दशमलब तीन ओभर खेल्दै आफ्ना सबै विकेट गुमाएर मात्र १६५ रन बनाउन सक्यो ।
वेस्ट इन्डिजको तर्फबाट दोश्रो पारीमा किएरन पावेलले सर्वाधिक ५१ रन बनाए भने कायल मायर्सले ३४, किमा रोच २७ र जर्मेन ब्ल्याकउडले २५ रनको पारी खेले पनि अन्य ब्याट्सम्यानले दोहोरो अंकमा रन जोड्न सकेनन् ।
दक्षिण अफ्रिकाको जितमा केशव महाराजले सर्वाधिक पाँच विकेट लिए भने कागिसो रबाडाले पनि तीन विकेट आफ्नो नाममा दर्ता गराए ।
यस अघि खेलमा टस हारेर पहिले ब्याटिङ गरेको दक्षिण अफ्रिकाले पहिलो पारीमा २९८ रन बनायो भने वेस्ट इन्डिजलाई मात्र १४९ रनमा रोक्दै १४९ रनको अग्रता लिन सफल भयो । दोश्रो पारीमा मात्र १७४ रनमा समेटिएको दक्षिण अफ्रिकाले कुल ३२३ रनको अग्रता लिएको थियो ।
