बलरहरूले घातक गर्दा घरेलु टोली वेस्ट इन्डिज विरुद्धको दोश्रो तथा अन्तिम टेस्टको दोश्रो दिन दक्षिण अफ्रिकाले १४९ रनको अग्रता लिन सफल भएको छ ।
दोश्रो दिनको खेल पाँच विकेटको नोक्सानीमा २१८ रनको अवस्थाबाट सुरु गरेको दक्षिण अफ्रिकाले ८० रन जोड्दा बाँकी पाँच बिकेट पनि गुमायो । जबाफी ब्याटिङ गरेको वेस्ट इन्डिजले मात्र ५४ ओभर खेल्दै १४९ रन जोड्दा आफ्ना सबै विकेट गुमायो भने पहिलो पारीको आधारमा १४९ रनले नै पछि रहेको छ ।
वेस्ट इन्डिजको लागि जेर्मेन ब्ल्याकउडले सर्वाधिक ४९ तथा शे होपले ४३ रन जोडे भने अन्य ब्याट्सम्यानले उल्लेख्य योगदान दिन सकेनन् ।
वेस्ट इन्डिजलाई सस्तोमै रोक्ने क्रममा वियान मुलदारले सर्वाधिक तीन विकेट लिए भने कागिसो रबाडा, लुंगी एनगिदी र केशव महाराजले समान २-२ विकेट आफ्नो नाममा दर्ता गराए ।
पहिलो दिनको खेलको समाप्तिमा ५९ रनमा अविजित रहेका विकेट किपर क्विन्टन डि कक मात्र चार रनले शतक बनाउन चुके । कायल मायर्सको बलमा आउट हुनु अघि उनले १६२ बलको सामना गर्दै आठ चौकाको मद्दतमा सर्वाधिक ९६ रन बनाए ।
त्यस बाहेक कागिसो रबाडा २१ रनमा अविजित रहे भने केशव महाराजले पनि १२ रनको योगदान दिए । पहिलो दिन दक्षिण अफ्रिकाका कप्तान एल्गर ७७ रनमा पेभेलियन फर्किएका थिए ।
वेस्ट इन्डिजका किमा रोच र कायल मायर्सले समान ३-३ विकेट हात पारे भने शान्नोन गाब्रियलले पनि आफ्नो नाममा दुई विकेट दर्ता गराए ।
दुई टेस्टको शृंखलामा दक्षिण अफ्रिका १-० ले अघि रहेको छ । यस अघि भएको पहिलो टेस्टमा दक्षिण अफ्रिकाले वेस्ट इन्डिजलाई एक पारी र ६३ रनको फराकिलो अन्तरले पराजित गरेको थियो ।
