नेपाल क्रिकेट संघले अगामी जुलाई तेश्रो साता स्पेनका लागि तय भएको आईसीसी बिश्वकप क्रिकेट लिग टु त्रिकोणात्मक श्रृंखलाका लागि २० जना खेलाडीलाई बन्द प्रशिक्षणका लागि बोलाएको छ ।
नेपालले आफ्नो दोश्रो श्रृंखला अन्तर्गत स्पेनको डेजर्ट स्प्रिंगस क्रिकेट ग्राउण्डमा स्कटल्याण्ड र नामिबियाबिरुद्ध खेल्न गइरहेको छ । श्रृंखलकोलागि बन्द प्रशिक्षणमा भेटेरान ब्याट्स्म्यान शरद भेषावकरलाई पनि स्थान दिइएको छ ।
यस्तै दुई एकदिवसीय राष्ट्रिय क्रिकेट प्रतियोगितामा उत्कृष्ट प्रदर्शन गरेका प्रिथु बास्कोटालाई पनि बन्द प्रशिक्षणका लागि बोलाइएको छ ।
अन्य खेलाडीहरुमा पवन शर्राफ, बिक्रम सोब, साहब आलम, सुशन भारी श्रेष्ठ, सन्दिप जोरा, कमल सिंह ऐरी, अविनाश बोहोरा, सोमपाल कामी रहेका छन् ।
यसअघि नेपालमै भएको ट्राइ नेशन ट्वान्टी ट्वान्टी श्रृंखलामा सहभागी खेलाडीहरुको बाहुल्यता एकदिवसीय टोलीको क्याम्पमा रहेको छ । कप्तान ज्ञानेन्द्र मल्ल, कुशल भुर्तेल, आरिफ शेख, आशिफ शेख, पारस खड्का, दिपेन्द्र सिंह ऐरि, कुशल मल्ल, बिनोद भण्डारी, करण केसी र सन्दिप लामिछानेले बन्द प्रशिक्षणमा रहेका छन् ।
चोटका कारण पुर्व कप्तान पारस खड्काले नेपालमा ट्वान्टी ट्वान्टी श्रृंखला खेलेका थिएनन् । नेपाल केही साता त्रिवि मैदानमा प्रशिक्षण गर्ने योजना बनाएको छ । बैदेशिक भ्रमण गर्ने योजनामा रहेको नेपालको अन्य तैयारीका बारे स्पष्ट भइसकेको छैन ।
हाल कोभिडका कारण आईसिसिले १८ जना खेलाडीसम्म लान मिल्ने व्यवस्था बनाएको छ ।
