स्पेनिस डिफेन्डर सर्जियो रामोसले १६ सिजन पछि रियल म्याड्रिड छोड्न लागेको क्लबले बिहीबार बिहान बिज्ञप्ती जारी गर्दै बताएको छ । रियलका अध्यक्ष फ्लोरेन्टइनो पिरेजले उनलाई संस्था र आफ्नो व्यक्तिगत तर्फबाट बिदाई गर्दै बिज्ञप्ती जारी गरेका हुन् । यो सँगै रियलको एक उत्कृष्ट युगको अन्त्य भएको छ ।
३५ वर्षिय रामोसले २००५ मा आफ्नो बाल्यकाल क्लब सेभिया छोड्दै रियल म्याड्रिड आएका थिए । रामोसमा रियलले खेलेका जती सबै प्रतियोगिता जितेका छन् । तर पछिल्लो सिजनहरुमा चोटका कारण उनले धेरै समय मैदानमा बिताउन पाएका थिएनन् । पहिलेका सिजनहरुमा तीन हजर मिनेट प्रती सिजन खेल्ने रामोसले यस सिजन एक हजार मिनेट पनि मैदानमा बिताएका थिएनन् ।
हल्ला अनुसार रियलसँग सम्बन्ध चिसिएसँगै उनले क्लब छोड्ने निर्णय लिएका हुन् । उनलाई म्यानचेस्टर युनाइटेड, लिभरपुल र इन्टर मायामी जस्ता क्लबले आफ्नो ट्रान्सफरको रुपमा हेरेका छन् ।
रामोसले १६ वर्ष रियलमा खेल्दा पाँच ला लिगा, चार च्याम्पियन्स लिग, दुई कोपा डेल रे र ११ वर्ष फिफाको उत्कृष्ट ११ मा आफ्नो नाम राखेका थिए ।
रामोसले स्पेनका लागि पनि लगतार अन्तराष्ट्रिय प्रतियोगिताहरु जितेका छन् । २००८ को युरो, २०१० को विश्वकप र २०१२ को युरो जित्दा उनी टोलीका मुख्य सदस्य थिए ।
रियलमा आफ्नो करीअर सकाउन नपाउने रामोस पहिलो खेलाडी भने हैनन् । यस अघि रियलले क्रिष्चियानो रोनाल्डो र इकर कासिलास जस्ता खेलाडीसँग सम्झौता रद्ध गरेको थियो । रियलको २०१२ देखी २०२० सम्म आईपुदा चुमेका उपाधिहरुको मुख्य हकदार रखेका खेलाडीहरुले अहिले रियल छोडिसकेका छन् । मार्सेलो मात्रै रियलमा सबै भन्दा धेरै वर्ष खेल्ने खेलाडी बनेका छन् ।
रामोस यो पटक स्पेनको टोलीमा पर्न पनि असफल भएका थिए । सेभियाका खेल निर्देशक मोन्चीका अनुसार भने रामोस आफ्नो पुरानै क्लब सेभिया फर्किने छन् ।