घरेलु टोली इंग्ल्यान्ड विरुद्धको दोश्रो तथा अन्तिम टेस्टमा आठ विकेटको सहज जित निकाल्दै न्युजिल्यान्डले टेस्ट शृंखला माथि कब्जा जमाएको छ । पहिलो टेस्ट बराबरीमा सकिए पछि दोश्रो टेस्टमा जित निकाल्दा न्युजिल्यान्डले शृंखला १-० ले आफ्नो पक्ष्यमा पार्न सफल भएको हो ।
चौथो दिन औपचारिकता मात्र बाँकी रहेको खेलमा ३८ रनको लक्ष्य पक्ष्याएको न्युजिल्यान्डले एक विकेटको नोक्सानीमा जित हात पार्यो ।
चौथो दिनको खेल नौं विकेटको नोक्सानीमा मात्र १२२ रनबाट सुरु गरेको इंग्ल्यान्डले पहिलो बलमा नै विकेट गुमाउँदा ३७ रनको मात्र अग्रता कायम गर्न सक्यो ।
न्युजिल्यान्डको जितमा दोश्रो पारीमा म्याट हेनरी र निल वागनरले समान ३-३ विकेट लिए भने एजाज पटेल र ट्रेन्ट बोल्टले पनि समान २-२ विकेट आफ्नो नाममा दर्ता गराउन सफल भए । पहिलो पारीमा बोल्टले सर्वाधिक चार विकेट लिएका थिए पनि हेनरीले तीन तथा पटेलले दुई विकेट हात पारेका थिए ।
टस जितेर पहिले ब्याटिङ गरेको इंग्ल्यान्डले आफ्नो पहिलो पारीमा ३०३ रन बनायो भने जबाफी ब्याटिङ गरेको न्युजिल्यान्डले ३८८ रन जोड्दै ८५ रनको अग्रता लिन सफल भएको थियो ।
इंग्ल्यान्डको लागि पहिलो पारीमा ड्यान लरेन्स र रोरी बर्न्सले सामना ८१-८१ रन बनाए भने मार्क उडले पनि ४१ रनको पारी खेले ।
न्युजिल्यान्डका विल योङले सर्वाधिक ८२ रन बनाए भने डेभन कन्वे र रस टेलरले समान ८०-८० रनको योगदान दिए ।
इंग्ल्यान्डका स्टुवार्ट ब्रोडले सर्वाधिक चार विकेट हात पारे भने मार्क उड र ओली स्टोनले समान २-२ विकेट आफ्नो नाममा दर्ता गराए ।
न्युजिल्यान्डले अब जुन १८ तारिकबाट सुरु हुने वर्ल्ड टेस्ट च्याम्पियनसिपमा भारतको सामना गर्नेछ ।
