राष्ट्रिय क्रिकेट टोलीको जर्सी डिजाइन गर्नको लागि प्रतिस्पर्धा खुल्ला 

नेपाल क्रिकेट संघ (क्यान) ले राष्ट्रिय क्रिकेट टोलीको जर्सी डिजाइन गर्नका लागि प्रतिस्पर्धा खुल्ला गरेको छ।  

डिजाइन गर्नेले राष्ट्रिय टोलीको जर्सी र ट्राउजर दुवैको लागि डिजाइन गर्न पर्ने हुन्छ । त्यस्तै उसले नेपाली टोलीले प्रयोग गर्ने जर्सीको अगाडि र पछाडिको भाग दुवैलाई ध्यानमा राखेर डिजाइन गर्न पर्ने हुन्छ । कुनै पनि व्यक्तिले जर्सीको डिजाइन गर्दा नेपालको राष्ट्रिय झन्डामा प्रयोग हुने रातो र निलो रङ्गको प्रयोग गर्न पर्ने छ । 

डिजाइनरले जर्सीको डिजाइन गर्दा राष्ट्रिय टोलीले पालना गर्न पर्ने अन्तर्राष्ट्रिय क्रिकेट परिषद (आईसीसी) को नियम अनुसार नै डिजाइन गर्न पर्ने हुन्छ ।      

क्यानले विज्ञापन एजेन्सी एडप्याड मार्फत माई सेकेण्ड टिचरलाई राष्ट्रिय टोलीको प्रमुख प्रायोजकको रुपमा पाएको हो । उत्कृष्ट डिजाइन बनाउनेले पुरस्कार स्वरुप नगद एक लाख पनि हात पार्ने छ । उक्त पुरस्कार राशी नेपाली राष्ट्रिय क्रिकेट टोलीको मुख्य प्रायोजक माई सेकेन्ड टिचर (एमएसटी) ले प्रयोजन गर्ने एड प्याडका प्रबन्ध निर्देशक सुरज गिरी बताए । 

नेपालले जुलाईमा विश्वकप लिग टु अन्तर्गतको स्पेनमा आयोजना हुने आफ्नो दोश्रो शृंखलामा स्कटल्याण्ड र नामिबियाको सामना गर्नेछ । उक्त शृंखलामा अहिले नै पुरष्कृत हुने डिजाइन नै नेपाली टोलीले आफ्नो जर्सी प्रयोग गर्नेछ ।    

आफ्नो डिजाइन दिने अन्तिम मिती यसै महिनाको १७ तारिक सम्म रहेको छ । डिजाइन क्यानको इमेल – info@cricketnepal.org मा गर्न पर्ने हुन्छ भने यस सम्बन्धी सम्पूर्ण जानकारी क्यानको वेबसाइट http://www.cricketnepal.org.np/ मा पनि राखिने छ ।  छनौट समितिमा क्यानको तर्कबाट २ जना र एडप्याड को तर्कबाट १ जना सम्मिलित हुने छन् ।

क्यानको आयोजनामा यसै महिनाको सुरुवातमा आयोजना भएको त्रिकोणात्मक शृंखलाका क्रममा नेपालको जर्सीलाई लिएर विरोध भएका कारण पनि क्यानले नयाँ जर्सीको डिजाइन बनाउन लाएको हो ।

‘हामीले नेपाली टोलीको जर्सी राम्रो र उत्कृष्ट होस् भन्ने हिसाबले क्यानसँग मिलेर खुल्ला प्रतिस्पर्धाबाट डिजाइन छनौटको लागि सहकार्य गरेका हौँ ,’ एमएसटीका सह संस्थापक सुलभ बुढाथोकीले बताए । ‘आशा छ यसमा धेरै भन्दा धेरैले भाग लिने छन् र नेपाली टोलीले सबैको आँखामा बस्ने खालको जर्सीको डिजाइन पाउने छ । उत्कृष्ट हुने डिजाइन नेपाली टोलीले आगामी दिनमा हुने प्रतियोगिताहरूमा त्यसै अनुरूप प्रयोग गर्नेछ ।’