दक्षिण अफ्रिकाका विकेट किपर ब्याट्सम्यान क्विन्टन डि ककले अविजित शतक प्रहार गर्दा घरेलु टोली वेस्ट इन्डिज पहिलो टेस्ट जोगाउन संघर्षरत रहेको छ ।
वेस्ट इन्डिजलाई पहिलो पारीमा मात्र ९७ रनमा रोकेको दक्षिण अफ्रिकाले आफ्नो पहिलो पारीमा ९६ दशमलब पाँच ओभर खेल्दै ३२२ रन बनायो । पहिलो पारीको आधारमा २२५ रनले पछि परेको वेस्ट इन्डिजले आज नै आफ्नो दोश्रो पारी सुरु गर्यो र दिनको खेलको समाप्तिमा ३० ओभर खेल्दै ८२ रनमा चार विकेट गुमाएको छ र अझै १४३ रनले पछि रहेको छ ।
दक्षिण अफ्रिकाको तर्फबाट अविजित रहेका विकेट किपर ब्याट्सम्यान क्विन्टन डि कक सर्वाधिक १४१ रन बनाए । १७० बलको सामना गर्दै उनले १२ चौका र सात छक्का प्रहार गरे । एक छोडबाट दक्षिण अफ्रिकाले लगातार रुपमा विकेट गुमाए पनि अर्को छोडबाट डि ककले आक्रामक ब्याटिङ गर्दै रन जोड्न सफल भए ।
डि कक बाहेक दक्षिण अफ्रिकाको लागि एडेन मार्क्रमले ६० तथा रसी भान डर डसेनले ४६ रनको पारी खेले भने वियान मुल्दारले पनि २५ रनको योगदान दिए ।
वेस्ट इन्डिजका जेसन होल्डरले सर्वाधिक चार विकेट लिए भने जयडेन सिल्सले तीन तथा किमा रोचले पनि आफ्नो नाममा दुई विकेट दर्ता गराउन सफल भए ।
वेस्ट इन्डिजको तर्फबाट दोश्रो पारीमा रोस्टन चेज २१ तथा जर्मेन ब्ल्याकउड १० रनमा अविजित रहेका छन् भने कप्तान ग्रेग ब्राथवेट सात, किएरन पावेल १३ तथा शे होप र कायल मायर्स सामना १२-१२ रनमा आउट भए ।
दोश्रो पारीमा दक्षिण अफ्रिकाका बलरहरू कागिसो रबाडा र एनरिच नोर्किएले समान २-२ विकेट हात पार्न सफल भए ।
पहिलो पारीमा वेस्ट इन्डिजलाई सस्तै रोक्ने क्रममा लुंगी एनगिदीले सर्वाधिक पाँच विकेट तथा नोर्किएले चार विकेट हात पारेका थिए । एनगिदीले १३ दशमलब पाँच ओभर बलिङ गर्दै मात्र १९ रन खर्चिए भने नोर्किएले ११ ओभरमा ३५ रन दिए । त्यस्तै कागिसो रबाडाले पनि आफ्नो नाममा एक विकेट दर्ता गराउन सफल भए ।