बर्न्स र लरेन्सको अर्धशतकमा सम्हालिँदै इंग्ल्यान्ड 

ओपनर रोरी बर्न्स र छैठौं नम्बरमा ब्याटिङ गर्न आएका ड्यान लरेन्सले अर्ध शतक प्रहार गरे पछि घरेलु टोली इंग्ल्यान्डले न्युजिल्याण्ड विरुद्धको दोश्रो तथा अन्तिम टेस्टको आफ्नो पहिलो पारीमा सम्हालिन पुगेको छ ।

खेलमा टस जितेर पहिले ब्याटिङ गरेको इंग्ल्यान्डले पहिलो दिनको खेलको समाप्तिमा सात विकेट गुमाएर २५८ रन बनाएको छ ।

इंग्ल्यान्डको तर्फबाट १८७ बलको सामना बर्न्सले १० चौकाको मद्दतमा सर्वाधिक ८१ बनाएर आउट भए भने १०० बल खेल्दै ११ चौका प्रहार गरेका लरेन्स ६७ रनमा अविजित छन् । त्यस्तै अर्का ओपनर डम सिब्ली ३५ रन बनाएर पेभेलियन फर्किए ।       

पहिलो विकेटका लागि बर्न्स र सिब्लीले ७२ रन जोड्दै राम्रो सुरुवात दिए । तर सिब्लीको विकेटको पतन पछि इंग्ल्यान्डले लगातार रुपमा विकेट गुमायो । तेश्रो नम्बरमा ब्याटिङ गर्न आएका ज्याक क्रली शून्य, कप्तान जो रुट चार, ओली पप १९ तथा जेम्स ब्रेस गोल्डेन डकआउट भए । पहिलो दिनको खेलको समाप्तिमा लरेन्सले १६ रनमा अविजित रहेका मार्क उडसँग मिलेर इंग्ल्यान्डको पारी सम्हाल्दै छन् ।

न्युजिल्यान्डका ट्रेन्ट बोल्ट, म्याट हेनरी र एजाज पटेलले समान २-२ विकेट हात पार्दै इंग्ल्यान्डलाई दबाबमा राख्न सफल भए ।

दुई खेलको टेस्ट शृंखला ०-० को अवस्थामा रहेको छ । पहिलो टेस्ट बराबरीमा सकिएको थियो ।