स्पेनिस राष्ट्रिय टोलीले मिड्फिल्डर सर्जियो बुसकेटलाई कोरोना भाईरसको संक्रमण देखिए पछि पाँच खेलाडीलाई ‘बायो बबल’ ट्रेनिङमा उपस्थित हुन आग्रह गरेको छ ।
स्पेनिस टोलीले कोरोना भाईरसको परिस्थिती सोचेको भन्दा नराम्रो भएमा खेलाडीहरुलाई तयार रहन समेत आग्रह गरेको छ । स्पेनले रोड्रिगो मोरेनो, पाब्लो फोर्नाल्स, कार्लोस सोलेर, ब्राइज मेन्डिस र राउल अबिओललाई अभ्यासका लागि बोलाएको हो ।
अझै पनि स्पेनिस राष्ट्रिय टोलीमा रियल म्याड्रिडका खेलाडीले भने स्थान बनाउने सकेनन् । प्रशिक्षक लुइस इनरिकेले पाँच खेलाडी बोलाए पनि नाचो फर्नान्डेजलाई नबोलाएको भन्दै रियल समर्थकहरुले आलोचना समेत गरेका छन् ।
बार्सिलोनाका मिड्फिल्डर बुसकेटलाई कोरोना संक्रमण देखिए पछि स्पेनिस टोली सबैलाई कोरोनाको खतरा रहेको थियो । बुस्केट हाल आईसोलेसनमा रहेका छन् ।
स्पेनिस फुटबल संघले एक बिज्ञप्ती निकाल्दै पाँच खेलाडीलाई अभ्यासमा राख्ने निर्णय लिएको बताएको छ । स्पेनले वुधबार लुथ्वानियासँग मैत्रिपूर्ण खेल खेल्दै छ भने आफ्नो युरो कप २०२० को पहिलो खेलमा स्वीडेनसँग भिड्दै छ ।
जुन १४ मा हुने पहिलो खेल स्पेनका लागि ठुलो चुनौती समेत छ । स्पेनको समुहमा स्वीडेन, पोल्याण्ड र स्लोभाकिया छन् ।
