इङ्गल्याण्ड प्रशिक्षक ग्यारेथ साउथगेटले आफ्नो टोली युरो कपको सेमिफाइनलमा पनि पुग्न नसक्ने हो भने ठूलो असफलतको रुपमा व्याख्या हुने बताएका छन् ।
रुसमा भएको २०१८ को बिश्वकपमा साउथगेटले इङ्गल्याण्डलाई सेमिफाइनलसम्म डोर्याएका थिए । युरो कपको सेमिफाइनल पनि नपुगेको खण्डमा के असफल साबित हुने हो भन्दा साउथगेट भन्छन्ः “हामीले यथार्थपरक भएर सोच्ने हो भने असफलता नै हुनेछ । हामीबाट कम से कम पनि सेमिफाइनल पुग्ने अपेक्षा छ र यसमा खरो उत्रनु पर्नेछ ।”
“हामी यसअघि दुई पटक युरो कपको सेमिफाइनल पुगिसकेका छौं र हाम्रो प्रयास एक कदम अगाडी बढाउने हो,” ११ जुनमा शुरु हुने युरोका लागि २६ सदस्यीय टोलीको घोषणा गर्ने क्रममा साउथगेटले भने ।
सेप्टेम्बर २०१६ मा प्रशिक्षक नियुक्त भएका साउथगेटले इङ्गल्याण्डलाई बिश्वकपमा २८ बर्ष यता कै उच्च स्थान दिदै रुसमा अन्तिम चारसम्म पुर्याएका थिए । एक बर्षपछि इङ्गल्याण्ड युएफा नेसन्स लिगको पनि सेमिफाइनल पुगेको थियो ।
टिमलाई लिएर जुन किसिमको उत्साह सृजना भएको छ त्यसलाई लिएर राम्रो ज्ञान छ, साउथगेटले भने ।
युरो कपको समुह डी मा रहेको इङ्गल्याण्डले आफ्नो पहिलो खेलमा क्रोएसियाको सामना गर्नेछ भने दोश्रोमा स्कटल्याण्ड र तेश्रोमा चेक रिपब्लिकसँग खेल्नेछ ।
२५ बर्ष तीन महिना औषत उमेर रहेको इङ्गल्याण्ड युरोमा सबैभन्दा युवा टोलीमध्येको एक टिम रहनेछ । साउथगेटले बोरुसिया डर्टमण्डका लागि उच्च प्रदर्शन दिदै आइरहेका जुड बेलिङ्गमलाई पनि समावेश गरेका छन् । वेलिङ्गम २००६ बिश्वकपमा थिओ वालकट पछि प्रमुख प्रतियोगिता खेल्ने सबैभन्दा युवा खेलाडी हुनेछन् ।
