चेल्सीका जर्मन फर्वार्ड काइ ह्याभर्ट्जले म्यानचेस्टर सिटीबिरुद्ध च्याम्पियन्स लिग फाइनलमा एक मात्र बिजयी गोल गरेपछि यो पलको लागि आफूले १५ बर्षदेखि मिहिनेत गरेको बताएका छन् ।
पोर्टोमा ह्याभर्ट्जले ४२ औं मिनेटमा गोल गरेपछि चेल्सीले ९ बर्षपछि बिश्व फुटबलको सबैभन्दा ठूलो क्लब प्रतियोगिाको उपाधि आफ्नो नाम लेखायो । यसअघि २०१२ मा बायर्न म्युनिखलाई पेनाल्टीमा पराजित गर्दै उपाधि जितेको चेल्सीका लागि ह्याभर्ट्जको त्यो पहिलो च्याम्पियन्स लिग गोल थियो ।
“मलाई थाहा छैन के भन्ने । मैले लामो समय कुरेको छु । म यो पलको लागि १५ बर्ष देखि मिहिनेत गर्दै आएको थिए । म निशब्द छु,” २१ बर्षिय ह्याभर्ट्जले भने ।
चेल्सी कप्तान सेजार अज्पिलिकेटाले युवा स्ट्राइकरको मुक्त कण्ठले प्रशंसा गरे । “ह्याभर्ट्जको मानसिकता माथिल्लो स्तरको छ । उनी एक दिन सुपरस्टार हुन्छन् । उनी बैतौड कुदिरहेका थिए र त्यसैले पनि यो पल उनकै लागि थियो,” उनले भने ।
“म यहाँ २०१३ मा च्याम्पियन्स लिग जितिसकेपछि मात्र आएको थिए । म त्यो सफलतालाई दोहोर्याउन चाहन्थे । यो पल साच्चिकै अविश्वसनीय छ । मेरो परिवार यही छ र मलाई आजको दिन बिशेष, निकै बिशेष रहनेछ,” अज्पिलिकेटाले थपे ।
फाइनलको म्यान अफ द म्याच घोषित फ्रेञ्च एनगोलो कान्टेले थोमस टुचेलको आगमनले चेल्सी परिवर्तन भएको बताए । जनवरीमा क्लब लेजेण्ड फ्रांक लाम्पार्डको स्थान लिएका टुचेलको आगमनपछि चेल्सी प्रिमियर लिगमा चौथो र एफए कपको फाइनलमा लेस्टर सिटीसँग पराजित भएपनि युरोपको राजा भने बनेको छ ।
“यो सबै नयाँ प्रशिक्षकको आगमनले नै भएको हो । हामीले आफ्नो रणनीतिमा बिशेष परिवर्तन ल्याएको थियौं र मिहिनेत पनि धेरै नै लागेको थियो,” कान्टेले भने ।
