भारती क्रिकेट बोर्ड (बिसीसीआई) ले ट्वान्टी ट्वान्टी विश्वकप अघि स्थगित भएको इन्डियन प्रिमियर लिग (आईपीएल) का बाँकी खेल गर्ने तयारी गरेको छ ।
बिसीसीआईले सेप्टेम्बर १८ देखि अक्टोबर १२ सम्मको समयमा आईपीएल गर्नका लागि विचार गरेको हो । सहभागी टोलीका खेलाडीहरुमा कोरोना संक्रमण भेटिए पछि मे चारमा २९ वटा खेल पश्चात रोकिएको आईपीएलको बाँकी खेल अब युएईमा गर्ने पनि योजनामा रहेको छ ।
तर उक्त समयमा आईपीएल आयोजना गर्न बिसीसीआईलाई सहज भने हुने छैन । भारतको आफ्नै तथा अन्य टोलीको खेल तालिका हेर्दा उसलाई यो गराउन फलामको चियुरा चपाए सरह हुने देखिन्छ । यदि त्यस समयमा आयोजना गर्ने हो भने ट्वान्टी ट्वान्टी विश्वकप त्यसको एक हप्ता अघि मात्र सकिन्छ । त्यस्तै क्यारेबियन प्रिमियर लिग (सिपीएल) पनि त्यसै समय अर्थात् अगष्ट २८ देखि सेप्टेम्बर १९ सम्म हुँदैछ जसका कारण वेस्ट इन्डिजका खेलाडीहरुको सहभागिता बारेमा नै निर्णय लिन पर्ने हुन्छ ।
बिसीसीआईले सिपीएलमा सहभागी खेलाडीहरुलाई आईपीएलमा उपलब्ध हुनका लागि वेस्ट इन्डिज बोर्डसँगको समन्वय गर्न पर्ने हुन्छ जसका लागि सिपीएल केहि समय अघिका लागि सार्न पर्ने हुन्छ । तर वेस्ट इन्डिजको खेल तालिका हेर्दा खेल सार्न सहज भने हुने देखिँदैन ।
त्यसै गरि भारतले इंग्ल्यान्ड क्रिकेट बोर्डसँग पनि समय मिलाउन पर्ने हुन्छ । आईपीएल सुचारु गर्नका लागि बिसीसीआईले इंग्ल्यान्ड क्रिकेट बोर्डलाई पनि पाँच खेलको टेस्ट शृंखला एक साता अघि सार्नका लागि आग्रह गरेको समाचार आएको थियो । भारतले इंग्ल्यान्ड भ्रमणका क्रममा घरेलु टोलीसँग पाँच टेस्ट खेल्दै छ र उक्त शृंखला अगष्ट चारमा सुरु भएर सेप्टेम्बर १४ मा सकिन्छ । भारतसँगको शृंखला पछि इंग्ल्यान्डले बंगलादेश र पाकिस्तानको पनि भ्रमण गर्ने कार्यक्रम रहेको छ ।
भारतले आफ्नै अन्तर्राष्ट्रिय खेल तालिका पनि मिलाउन पर्ने हुन्छ । भारतले दक्षिण अफ्रिकासँग आफ्नो घरेलु मैदानमा विश्वकप अघि समान ३-३ ट्वान्टी ट्वान्टी र एकदिवसीय खेल खेल्ने कार्यक्रम छ ।
बिसीसीआईले आईपीएल सुचारु गर्नका लागि सबै फ्रेन्चाइजहरुसँग पनि छलफल सुरु गरेको छ । उसले बाँकी ३१ खेलका लागि २५ दिन को समय पनि फ्रेन्चाइजहरुसँग मागेको छ ।