‘खेलाडीहरु वान टिम, जय नेपाल लेख्छन्, मिडिया खेलाडीको लागि भिड्दैछन्’

राष्ट्रिय फुटबल टोलीका प्रशिक्षक अब्दुल्लाह अलमुताइरीले राष्ट्रिय टोलीको छनौटलाई लिएर मिडियाले दिएको प्रतिकृयाले आफू निकै निराश भएको बताएका छन् ।

अब्दुल्लाहले मङ्गलवार इराकसँग बासरामा हुन गइरहेको अन्तर्राष्ट्रिय मैत्रीपूर्ण र बिश्वकप छनोटको बाकीँ रहेका खेलहरुका लागि २३ सदस्यीय नेपाली टोलीको घोषणा गरेका थिए ।

टिमको बिषयमा जानकारी दिनका लागि भएको पत्रकार सम्मेलनमा अलमुताइरीले मिडिया सकारात्मक हुन नसकेको भन्दै लामो समय खर्चिएका थिए ।

“धेरैले अहिले छानेको टिम लिएर खेल्ने हो भने आधा दर्जन गोल खाने कुरा गर्न थालेका छन् । तर कोसँग ? तपाईहरुले कति वटा खेल जित्नु भएको छ (ठूला टिमहरुसँग) ? म तथ्यांकमा गलत छु भने मलाई माफ गर्नु होला तर कतिवटा खेलहरु जित्नु भएको छ र कति वटा अन्तर्राष्ट्रिय उपाधि,” अहिलेसम्म ठूलो टिमहरुबिरुद्ध बिगतमा गरिएका कमजोर प्रदर्शनहरुतर्फ इँगित गर्दै अब्दुल्लाहले भने ।

“हामीले परिवर्तनको थालनी गर्नु पर्छ र त्यसको लागि रिस्क लिन आवश्यक छ । यसको लागि तपाईहरुले (मिडिया) सपोर्ट गर्नु पर्छ, समर्थकहरुले भन्दा पनि । सबै खेलाडीहरुले वान टिम जय नेपाल भन्दै लेखिरहेका छन्, तर यहाँ मिडिया खेलाडीहरुको लागि नै भिडिरहेका छन् । मलाई यो मन परेको छैन । मलाई माफ गर्नुहोला तर तपाईहरुको प्रतिक्रियाले म निकै दुखी छु,” अब्दुल्लाहले थपे ।

“पछिल्लो पटक अष्ट्रेलियासँग ५–० ले हार्दाको नेपाली टोलीको औषत उमेर कति थियो ? ३१ ? अहिलेको औषत उमेर २३ छ । यो टोली अहिले हार्ने हो भने पनि दुई बर्षपछि जित्नेछ । म टिममा नहुँदा नै जित्न सक्छन् । तर म पछि आउने प्रशिक्षकले त्यही नियम अनुशरण गर्दै खेलाउने हो भने उनी च्याम्पियन बन्न सक्छन्,” भावुक हुदै उनले भने ।

अब्दुल्लाहले आफू घाइते खेलाडीहरु लिएर उनीहरुको भविष्य बिगार्ने पक्षमा नरहेको पनि बताएका थिए ।

प्रशिक्षक अब्दुल्लाहको प्रतिकृया भिडियोमा