फेरान टोरेसले ह्याट्रिक पुरा गरेपछि इङ्गलिस प्रिमियर लिगमा म्यानचेस्टर सिटी दुई पटक पछि परेको स्थितिलाई उल्टाउदै न्युकासल युनाइटेडलाई ४–३ ले पराजित गर्न सफल भएको छ ।
चार सिजनमा तेश्रो उपाधि पक्का गरिसकेको सिटीको जितमा टोरेसको ह्याट्रिक र यस क्रममा उनको ब्याक हिल फिनिसिङ्ग प्रमुख हाइलाइट रह्यो ।
झण्डै एक दशकमा पहिलो इङ्गलिस शिर्ष श्रेणीको खेल दिदै पेप ग्वार्डियोलाले स्कट कार्सनलाई गोलपोस्टको जिम्मेवारी दिएको खेलमा सिटी आधा घण्टा नबित्दै एमिल क्राफ्तको गोलले पछि परेको थियो ।
जाओ क्यान्सेलोले ३९ औं मिनेटमा बराबरी गोल गरेको केही मिनेटमै इके गुन्डोगानको क्रसमा टोरेसले सिटीलाई अग्रता दिलाएका थिए । तर इन्जुरी समयमा जोलिन्टनले गोल गरेपछि पहिलो हाफ २–२ गोलको बराबरीमा सक्किएको थियो ।
जो विलोकले ६२ औं मिनेटमा प्रहार गरेको पेनाल्टी कार्सनले बचाएपछि रिबाउण्डमा गोल गर्दै न्युकासललाई एक पटक फेरि अग्रता दिलाउदा सिटी खेलमा पुन पछि परेको थियो । तर टोरेसले त्यसको चार मिनेटको अन्तरलामा दुई गोल गर्दै सिटीलाई सनसनीपूर्ण जित दिलाएका थिए ।
ग्वार्डियोलाले यो सिजन लगातार १२ औं अवे खेलमा जित हात पारेका हुन् । सिटी लगातार २३ अवे खेलमा अपराजित रहदै आएको छ ।
