अन्तर्राष्ट्रिय क्रिकेट काउन्सिल (आईसिसि) ट्वान्टी ट्वान्टी बिश्वकपसँगै एकदिवसीय बिश्वकपमा पनि बढी टिमको सहभागिता गराउनुका साथै यसअघि सञ्चालन हुँदै आएको अन्तर महादेशीय कप फर्काउन तर्फ सकारात्मक देखिएको छ ।
आईसिसिले चाडै नै यो निर्णय लिन नजिक पुगिरहदा यसले नेपालसँगै धेरै एशोसिएट राष्ट्रहरुको ५० ओभरको बिश्वकप खेल्ने र टेस्ट राष्ट्र बन्ने सपना साकार हुन सक्छ ।
यसै बर्ष भारतमा आयोजना हुने ट्वान्टी ट्वान्टी विश्वकपमा १६ टोलीको नै सहभागिता रहनेछ भने २०२२ मा अष्ट्रेलियामा हुने प्रतियोगितामा पनि त्यही संख्यामा टिमहरु रहने छन् । २०२२ को ट्वान्टी ट्वान्टी बिश्वकपका लागि नेपालले सिधै ग्लोबल क्वालिफायरमा स्थान बनाइसकेको छ ।
तर सन् २०२४ को संस्करणमा आईसिसिले यो संख्या २० बनाउन गइरहेको क्रिकइन्फोले जनाएको छ । यो संरचनाको बिश्वकपमा पाँच टिमको चार समुह विभाजन गर्दै प्रतियोगिता गराइनेछ ।
त्यस्तै आईसीसीले एकदिवसीय विश्वकपमा पनि धेरै राष्ट्रलाई स्थान दिनुको साथ साथै इन्टरकन्टिनेन्टल कपलाई पनि अर्कै नाम दिएर फेरी प्रतियोगिता सुरु गर्ने भएको छ । यसको साथै महिला प्रतियोगितामा पनि सहभागी राष्ट्रको संख्या बढाउनुको साथ साथै क्रिकेटलाई ओलम्पिकमा सहभागिता पनि गराउने भएको छ ।
सन् २००७ मा १६ राष्ट्रको सहभागिता रहेको एकदिवसीय विश्वकपमा त्यस पछि सहभागी टोलीको संख्या घटाएर सन् २०११ मा १४ तथा सन् २०१५ र २०१९ मा १० राष्ट्रमा सिमित गरिएको थियो । ब्रोडकास्टरहरुले कम भन्दा कम खेलहरु हुँदा आर्थिक रुपमा प्रायोजकहरु आकर्षित हुने धारणा राखेपनि टिमको संख्या घटाइएको थियो ।
हालै प्रमुख कार्यकारीहरुको बैठकले माथि उल्लेखित विषयमा छलफल गरेका थिए । यसका बारेमा केहि निर्णय नभए पनि सबैले यसमा सहमति जनाएका थिए र आईसीसीले छिट्टै निर्णय लिने पनि जनाइएको छ ।
सबैभन्दा ठूलो निर्णय भने चार दिने क्रिकेटको रुपमा रहेको अन्तर महादेशीय कपको पनरागमन हुन सक्छ । इन्टर कन्टिनेन्टल कप नाम दिइएको प्रतियोगिता एशोसिएट राष्ट्रहरुको लागि प्रथम श्रेणीको क्रिकेटको अनुभव गर्ने आधार रहदै आएको थियो ।
२०१९ को बिश्वकपसँगै यो प्रतियोगिता बन्दा हँदा एशोसिएट राष्ट्रहरु कसरी टेस्ट राष्ट्र बन्ने भन्ने अन्यौल थियो । आयरल्याण्ड र अफगानिस्तान यही इन्टर कन्टिनेन्टल कपको प्रदर्शनपछि टेस्ट राष्ट्र बनेका थिए ।
यस बाहेक आईसीसीको पछिल्लो बैठकमा इंग्ल्यान्डका टम ह्यारीसनले क्रिकेटले पनि ओलम्पिकमा सहभागिता जनाउनु पर्ने कुरा उठाएका थिए । भारतीय क्रिकेट बोर्डले पनि यसमा सहमती जनाएको छ । तर उसले इन्डियन ओलम्पिक एसोसिएसनको हस्तक्षेप सहन नसक्ने जनाएको थियो ।
