च्याम्पियन्स लिगमा स्थान बनाउन कसरत गरिरहेको लेस्टर सिटीमाथि ४–२ को शान्दार जित हात पार्दै न्युकासल युनाइटेड इङ्गलिस प्रिमियर लिगबाट रेलिगेट हुनबाट जोगिन मात्र एक अंक टाढा रहेको छ ।
७३ औं मिनेटमा ४–० को अग्रता लिएपछि न्युकासलको लागि महत्वपूर्ण जित सुनिश्चित भएको थियो । न्युकासलको जितले लेस्टरको च्याम्पियन्स लिगमा छनोट हुने अभियानमा पनि केही धक्का लागेको छ । ३५ खेलपछि लेस्टर ६३ अंक सहित तेश्रो स्थानमा छ भने एक खेल कम खेलेका चेल्सीको ६१, वेष्ट ह्यामको ५८ र टोटेन्ह्यामको ५६ अंक छ ।
१३ औं स्थानमा रहेको न्युकासलले अब बाँकी रहेका तीन खेलबाट एक अंक मात्र बटुले रेलिसेसन बचाउने छ । रेलिगेसन जोनमा रहेका फुलह्यामको २७ र वेष्टब्रोमको २६ अंक छ । १७ अंक मात्र रहेको सेफिल्ड युनाइटेड भने रेलिगेट भइसकेको छ ।
जो विलकले २२ औं मिनेटमा अग्रता दिलाएपछि अवे मैदानमा न्युकासल पउल डमेटको गोलसँगै पहिलो हाफमा २–० ले अगाडी बढेको थियो । क्यालम विल्सनले त्यसपछि ६५ र ७३ औं मिनेटमा गोल गर्दै लेस्टरलाई लज्जास्पद हार तर्फ धकेलेका थिए ।
मार्क अलब्राइटन र केलेची इनियाचोले दुई गोल त फर्काए तर न्युकासललाई जितबाट रोक्न धेरै ढिलो भइसकेको थियो । यो सिजन लेस्टरले घरेलु मैदानमा व्यहोरेको यो आठौं पराजय थियो ।
लेस्टर भन्दा अगाडी यो सिजन घरमै सबैभन्दा बढी खेल हार्ने टोलीहरुमा सेफिल्ड युनाइटेड (१२) र फुलह्याम (११) रहेका छन् । पछिल्लो पाँच खेलमा मात्र एकमा पराजय व्यहोरेको न्युकासलले १० अंक जोडेको हो ।
