इङ्गल्याण्डको काउन्टी क्रिकेट क्लबहरुको समुहले इण्डियन प्रिमियर लिगका बाकी रहेका खेलहरु आयोजना गर्न सकिने सम्भावनाको बिषयलाई लिएर इङ्गल्याण्ड तथा वेल्स क्रिकेट बोर्डलाई पत्र लेखेका छन् ।
निकै सतर्कताका बावजुद आईपिएलको बायो बबलमा कोरोना भाइरसको संक्रमण फैलिएपछि प्रतियोगिता मङ्गलवार स्थगित गरिएको थियो । प्रतियोगिता सम्पन्न गर्नका लागि भारतीय क्रिकेट बोर्ड (बिसिसिआई) ले अर्को आयोजना हेरे अथवा नहेरेको बिषयमा केही सार्वजनिक गरेको छैन ।
वारविकसायर, सरे र मरिलबोन क्रिकेट क्लब (लर्डस) लगायतका काउन्टी क्लबहरु आईपिएलका बाँकी खेलहरुको आयोजनामा इच्छुक रहेको क्रिकइन्फाले एक रिपोर्टमा सार्वजनिक गरेको हो ।
लंंकासायरले पनि यसमा सहमति जनाएको तर उनीहरुले ओल्ड ट्राफोर्डलाई आयोजना स्थल बनाउने बिषयलाई लिएर प्रस्ताव भने गरेका छैनन् ।
आईपिएलमा बाँकी रहेका ३१ खेलहरु फेरि आयोजना गरिने हो भने अन्तर्राष्ट्रिय क्यालेन्डरको निकै नै व्यस्त तालिकाको बीच व्यवस्था गर्नु पर्ने हुन्छ । इङ्गल्याण्डले भारतबिरुद्ध सेप्टेम्बर ५ मा पाँच टेस्टको श्रृंखला खेलिसकेपछि बङ्गलादेश र पाकिस्तानको भ्रमण गर्न गइरहेको छ ।
अक्टोबरमा भारतमै ट्वान्टी ट्वान्टी बिश्वकप हुन गइरहेको छ तर उक्त प्रतियोगिता पनि भारतमा कोरोनाले भयावह स्थिति सृजना उत्पन्न हुँदा युएईमा सार्न सकिने भएको छ ।
आईपिएल एक पटक दक्षिण अफ्रिका र गत सिजनमात्रै पनि युएईमा आयोजना भएको थियो ।