ओलादिपो ओलावाले अफिजको स्थानमा आएका दर्शन गुरुङले नेपाल सुपर लिगकै उत्कृष्ट मध्येको एक गोल गरेपछि धनगढी एफसीले प्ले अफमा आफ्नो स्थान सुरक्षित गरेको छ ।
दशरथ रँगशालामा प्रमुख स्ट्राइकर तथा प्रतियोगिताका सर्वाधिक गोलकर्ता ओलादिपो ओलावाले अफिजलाई आधा घण्टापछि नै गुमाएको धनगढीलाई दर्शनले सनसनीपूर्ण गोल गर्दै जित दिलाएका थिए ।
जितपछि धनगढीले पाँच खेलपछि १० अंक भएको छ भने शिर्ष चारमा आफ्नो स्थान पक्का गरेको छ । पोखराको पाँच खेलपछि पाँच अंक रहेको छ भने प्ले अफका लागि उसको यात्रा अझै कठिन बनेको छ ।
दोश्रो स्थानमा झरेको बिराटनगर र तेश्रो स्थानमा रहेको काठमाडौं रेजर्सको चार खेलबाट समान ७ अंक रहेको छ । धनगढीले आफ्नो अन्तिम खेल बुटवल लुम्बिनीसँग खेल्नेछ ।
खेलमा दर्शनको गोल उत्कृष्ट रह्यो । उनले दोश्रो हाफमा बनेको पहिलो अवसरमा पोखरा गोलकिपर दिप कार्कीलाई प्रहार गरे तर अर्को पटक भने अनपेक्षित गोलमा सफल रहे । एक मिनेट भित्रै पोखराको डिफेन्सबाट क्लियर भएको बललाई झण्डै ३५ यार्डबाट हाफ भली प्रहार गर्दै लिगकै उत्कृष्ट गोल प्रहार गरेका थिए ।
दिप केही अगाडी बढेको प्रहारमा दर्शनको प्रहार उचाई लिदै झर्दा पोखरा गोलकिपरले ठम्याउनै सकेनन् ।
धनगढी दावेदार रहदा पहिलो अवसर उसले नै सृजना गरेको थियो । २२ औं मिनेटमा बिशाल राइले प्रहार गरेको फ्रि–किकमा तीन पोखरा डिफेन्डरहरुले बल क्लियर गर्न नसक्दा ओलावालेले ६ यार्ड बाहिरबाटै गोलको मौका पाए तर उनको प्रहार डिफ्लेक्ट भएर गएको थियो ।
चार मिनेटपछि धनगढीलाई किरण चेम्जोङले गोल खानबाट बचाए । आयुष घलानको राम्रो पासमा मौसाले बल लिएर बक्स भित्रबाट ओपन चान्समा गरेको प्रहार किरणले रोके भने रिबाउण्डमा बल रवि पासवानतर्फ जाँदा उनको शट बाहिरिएको थियो ।
४० औं मिनेटमा मौसाको फ्रि किकमा प्राप्त अवसरमा रविले पहिलो टचमा प्रहार गर्न चुकेका थिए । नवयुगले पोस्ट नजिकै बल पाँउदा पनि अशोक खवासले डिफेन्ड गरिदिएका थिए । कर्नरमा किरणले केही राम्रो निर्णय गर्दै संकट टारेका थिए ।
७३ औं मिनेटमा पोखराले बराबरी गर्ने सुनौलो अवसर गुमायो । प्रहार गरेको कर्नर रफाएल रिम्गागोले हेडरमार्फत ६ यार्ड भित्र खेलाउदै सौजन राईले क्लियर गर्न नसक्दा अनिल गुरुङले पाए र तर उनको प्रहार दिनेश राजबंशीले छेक्दै कर्नरका लागि पठाएका थिए ।
९२ औं मिनेटमा रिम्गागोको लामो बलमा नवयुगको हेडरलाइए किरणले मुक्सिलले बचाएका थिए ।