ओपनर शिखर धवनको उत्कृस्ट ब्याटिङको मद्धतमा १४ औं संस्करणको इन्डियन प्रिमियर लिग (आईपीएल) अन्तर्गत आफ्नो आठौँ खेलमा पन्जाब किंग्सलाई सात विकेटले पराजित गर्दै दिल्ली क्यापिटल्स अंक तालिकाको शिर्ष स्थानमा उक्लिएको छ ।
जारी सिजन छैठौं जित निकालेको दिल्ली १२ अंक सहित अंक तालिकाको पहिलो स्थानमा उक्लिएको हो । क्रमश दोश्रो र तेश्रो स्थानमा रहेका चेन्नाई सुपर किंग्स र रोयल च्यालेन्जर्स बेंगलोरले दिल्ली भन्दा एक खेल कम खेलेका छन् र दुबैको समान १०-१० अंक रहेको छ ।
पन्जाबले दिएको १६७ रनको मध्यम लक्ष्य दिल्लीले १७ दशमलब चार ओभर खेल्दै तीन विकेटको नोक्सानीमा पक्ष्याएको हो ।
दिल्लीको जितमा ओपनर शिखर धवनले अविजित रहँदै सर्वाधिक ६९ रन बनाए । ४७ बलको सामना गर्दै ६ चौका र दुई छक्का प्रहार गरेका उनले २२ बलमा समान ३-३ चौका र छक्काको मद्धतमा ३९ रन बनाएका पृथ्वी शसँग मिलेर ६ दशमलब एक ओभरमा ६३ रन जोड्दै दिल्लीलाई आक्रमक सुरुवात दिलाए ।
त्यस्तै दिल्लीको जितमा स्टिभ स्मिथले २५, कप्तान रिशब पन्तले १४ तथा शिम्रोन हेटमायरले चार बलमा अविजित १६ रनको योगदान दिए ।
सुरुवात राम्रो गर्न नसके पनि कप्तान मायंक अगरवालको अविजित ९९ रनको मद्धतमा खेलमा टस हारेर पहिले ब्याटिङ गरेको पन्जाबले पुरै २० ओभर खेल्दै छ विकेटको नोक्सानीमा १६६ रनको चुनौतिपूर्ण योगफल तयार पार्यो ।
कप्तान केएल राहुलको एपेन्डिसाइटिसको शल्यक्रिया गर्न पर्ने भए पछि आजको खेलमा कप्तानी गरेका मायंक अगरवालले सर्वाधिक ९९ रनको पारी खेले । अविजित रहेका उनले ५८ बलको सामना गर्दै आठ चौका र चार छक्का प्रहार गरे ।
अगरवाल बाहेक पन्जाबको तर्फबाट डाविड मालानले २६ तथा क्रिस गेलले १३ रनको योगदान दिए ।
दिल्लीका कागिसो रबाडाले चार ओभरमा ३६ रन खर्चिएर सर्वाधिक तीन विकेट लिए भने आवेष खान र अक्सर पटेलले पनि समान १-१ विकेट आफ्नो नाममा दर्ता गराए ।
