इङ्गल्याण्डका ओपनर जोस बटलरले शान्दार शतक प्रहार गरेपछि राजस्थान रोयल्सले इण्डियन प्रिमियर लिगमा सनराइजर्स हैदराबादलाई ५५ रनको फराकिलो अन्तरले पराजित गर्दै तेश्रो जित हात पारेको छ ।
हैदराबाद बलरहरुमाथि बटलर पूर्ण रुपमा हावी भएपछि राजस्थानले २० ओभरमा मात्र तीन विकेट गुमाउदै २ सय २० रनको बिशाल योगफल खडा गर्यो । बट्लरले ६४ बलमै १ सय २४ रन ठोकेका थिए ।
यो सिजन राजस्थानका लागि शतक बनाउने उनी दोश्रो खेलाडी हुन् । यसअघि कप्तान सन्जु स्याम्सनले पनि शतक प्रहार गरेका थिए । जितपछि राजस्थान ६ अंकका साथ पाचौं स्थानमा उक्लिएको छ ।
निकै खराब प्रदर्शन गर्दै पहिलो ७ मध्ये मात्र एक खेल जित्न सफल हैदराबादलाई पहिलो तीन ब्याट्स्म्यानहरुले शुरुवात दिलाएपनि ठूलो स्कोरमा बदल्न नसक्दा ८ विकेटको क्षतिमा १ सय ६५ रन मात्र बनाउन सक्यो ।
राजस्थानका लागि मुस्तफिजुर रहमान र क्रिस मोरिसले समान ३ विकेट लिए । हैदराबादका लागि ओपनरद्वय मनिष पाण्डेले ३१ र जोनी बेयरस्टोले ३० रन बनाए ।
यसअघि यशस्वी जैसवाल (१२) लाई १७ रनमा गुमाएपछि बट्लरले स्याम्सनसँग दोश्रो विकेटका लागि १ सय ५० रनको शान्दार साझेदारी गरेका थिए । स्याम्सनले ३३ बलमा चार चौका र दुई छक्काको मद्दतमा ४८ रन बनाए ।
स्याम्सनको विकेट पतनपछि बट्लरले नै राजस्थानको स्कोरलाई गति दिने काम गरेका थिए । उनले तेश्रो विकेटका लागि ४२ रन जोड्दा रियान परागले मात्र १५ रन बनाएका थिए ।
बट्लरको इनिङ्गसमा ११ चौका र ८ छक्का सामेल थियो ।