स्टार युवा स्ट्राइकर एर्लिङ्ग हालान्ड अनुपस्थित रहे पनि बोरुसिया डर्टमण्ड होल्स्टेन किएललाई ५–० ले पराजित गर्दै जर्मन कपको फाइनलमा प्रवेश गरेको छ ।
शनिबार राति सम्पन्न दोश्रो सेमिफाइनलका लागि तिघ्राको चोटका कारण हालान्ड उपस्थित थिएनन् । तर जियोभानी रेनाले शुरुवाती दुई गोल गर्दै डर्टमण्डलाई सहज जित तर्फ डोर्याएका थिए । मे १३ मा बर्लिन ओलम्पिक स्टेडियममा हुने फाइनलमा डर्टमण्डले आरबी लाइपजिगसँग खेल्नेछ ।
लाइपजिगले शुक्रबारको निकै नै प्रतिस्पर्धात्मक पहिलो सेमिफाइनलमा एमिल रोसबर्गको १ सय २१ औं मिनेटको गोलमा वेर्डर ब्रेमनलाई २–१ ले हराएको थियो ।
“हाम्रो पोस्ट अगाडीको प्रदर्शन एक समान थियो । झण्डै सबै शट गोलमा परिणत हुन पुग्यो । फाइनल पुगेकोमा हामी निकै खुशी छौं,” डर्टमण्ड कप्तान मार्को रुसले भने ।
जनवरीमा जर्मन घरेलु फुटबलको महारथी बायर्न म्युनिखलाई टाई ब्रेकरमा नकआउट गर्दै सनसनी मच्चाएको किएल अर्को स्तब्धपुर्ण नतिजाको नजिक पनि पुग्न सकेन । १६ औं मिनेटमै डर्टमण्डको उत्कृष्ट टिम गोलमा १८ बर्षिय रेनाले फिनिसिङ्ग गरेका थिए ।
२५ औं मिनेटमा अमेरिकी फुटबलरले राफेल गुरुरेलोले दिएको ब्याक हिल पासमा दोश्रो गोल गरे । ६ मिनेटपछि नै रुसले एम्री च्यानले माथिबाट दिएको बलमा बक्स भित्रबाट गोल गरे । थोर्गन हजार्ड र जुड बेलिँघमले अरु गोल थपेपछि डर्टमण्डले फराकिलो जित हात पार्यो ।