अंक तालिकाको पुछारमा रहेको सनराईजर्स हैदराबाद माथि सात विकेटको सहज जित निकाल्दै चेन्नाई सुपर किंग्स पुन १४ औं संस्करणको इन्डियन प्रिमियर लिग (आईपीएल) को शिर्ष स्थानमा उक्लिएको छ ।
छ खेल खेलेको चेन्नाईको १० अंक रहेको छ । समान छ खेलमा १० अंक नै रहे पनि रोयल च्यालेन्जर्स बेंगलोर नेट रन रेटका आधारमा दोश्रो स्थानमा रहेको छ । आजको खेल सहित यस सिजन छ खेलमा पाँचौं हारको सामना गरेको हैदराबाद दुई अंक सहित आठौं स्थानमा रहेको छ ।
जितका लागि १७२ रनको लक्ष्य पक्ष्याएको चेन्नाईले १८ दशमलब तीन ओभर खेल्दै तीन विकेटको नोक्सानीमा लक्ष्य पार गर्यो ।
चेन्नाईको जितमा ओपनरद्वय रुतुराज गाइकवाड र फाफ डु प्लेसिसले क्रमश ४४ बलमा १२ चौका सहित ७५ रन बनाए तथा ३८ बलमा छ चौका र एक छक्काको मद्धतमा ५६ रनको पारी खेले । विशाल लक्ष्य सहित ब्याटिंगमा आएको चेन्नाईको जितमा गाइकवाड र डु प्लेसिसले १३ ओभरमा १२९ रन जोड्दै जितको आधार तय गरेका थिए ।
यस अघि खेलमा टस जितेर पहिले ब्याटिङ गरेको हैदराबादका कप्तान डेभिड वार्नर मनिष पाण्डेले अर्धशतक प्रहार गरे पछि पुरै २० ओभर खेल्दै तीन विकेटको नोक्सानीमा १७१ रन बनायो ।
हैदराबादको तर्फबाट तेश्रो नम्बरमा ब्याटिङ गर्न आएका पाण्डेले सर्वाधिक ६१ रन बनाए भने ओपनर वार्नरले पनि ५७ रनको योगदान दिए । लुंगी एनगिदीको बलमा आउट भएका दुबैले क्रमश ४६ बलमा पाँच चौका र एक छक्का तथा ५५ बलमा तीन चौका र दुई छक्का प्रहार गरे ।
त्यस्तै अविजित रहेका केन विलियम सन र केदार जाधवले क्रमश १० बलमा २६ रन तथा चार बलमा १२ रनको पारी खेले भने अर्का ओपनर जोनी बैरस्टोले सात रन भन्दा जोड्न सकेनन् ।
चेन्नाईका लुंगी एनगिदीले सर्वाधिक दुई विकेट लिए भने साम कर्रनले पनि आफ्नो नाममा एक विकेट दर्ता गराए ।