१४ औं संस्करणको इन्डियन प्रिमियर लिग (आईपीएल) को २१ औं खेलमा कोलकाता नाइट राईडर्सले पन्जाब किंग्स माथि पाँच विकेटको सहज जित दर्ता गराएको छ । जारी सिजन यो कोलकाताको दोश्रो जित हो भने पन्जाबको चौथों हार हो ।
जितका लागि १२४ रनको सामान्य लक्ष्य लिएर ब्याटिङमा आएको कोलकाताले २० बल अगावै पाँच विकेटको नोक्सानीमा लक्ष्य पार गर्यो ।
सानो लक्ष्य पक्ष्याएको कोलकाताले पनि सुरुवात राम्रो गर्न सकेन । ओपनर नितिश राना र चौथों नम्बरमा ब्याटिङ गर्न आएका सुनिल नारायण समान शुन्य रनमा तथा अर्का ओपनर शुबमन गिल नौं रनमा आउट हुँदा १७ रनमा तीन विकेट गुमाएको कोलकाताको लागि कप्तान ओइन मोर्गन र राहुल त्रिपाठीले चौथों विकेटका लागि ६६ रनको साझेदारी गर्दै जितको आधार तयार पारे ।
त्रिपाठी ४१ रन बनाएर पेभेलियन फर्किए पनि कप्तान मोर्गनले अविजित ४७ रन जोड्दै कोलकातालाई जित दिलाए ।
यस अघि खेलमा टस हारेर पहिले ब्याटिङ गरेको पन्जाबले २० ओभरमा नौं विकेट गुमाएर १२३ रनको सामान्य योगफल बनाउन सक्यो ।
पन्जाबको लागि सुस्त खेलेका मायंक अगरवालले ३४ बलमा सर्वाधिक ३१ रन बनाए भने आक्रमक खेलेका क्रिस जोर्डनले १८ बलमा ३० रनको पारी खेले । त्यस्तै कप्तान केएल राहुलले १९ रन जोड्दा क्रिस गेल गोल्डेन डकआउट हुन पुगे ।
पन्जाबलाई सानो योगफलमा रोक्ने क्रममा कोलकाताका प्रसिध कृष्णाले सर्वाधिक चार विकेट लिए भने सुनिल नारायण र प्याट कमिन्सले पनि आ-आफ्नो नाममा सामना २-२ विकेट दर्ता गराए ।