आफ्नो पहिलो खेलमा काठमाडौं रेजर्ससँग पराजित भएपछि ललितपुर सिटी एफसी नेपाल सुपर लिग अन्तर्गत सोमबार एफसी चितवनबिरुद्ध प्रतियोगितामा पहिलो जितको खोजीमा हुनेछ ।
अञ्जन बिष्ट मार्की रहेको ललितपुरले पहिलो खेलमा काठमाडौं रेजर्ससँग १–० को साँघुरो हार व्यहोरेको थियो । खेलमा केही गोल गर्ने मौकामा चुकेको ललितपुरको टोली राम्रो देखिए पनि संगठित भने देखिएको छैन ।
नेपाललाई थ्रि नेसन्स कप जिताएका घरेल प्रशिक्षाक बालगोपालबिरुद्ध ललितपुर राम्रो योजनामा देखिएको थिएन । पहिलो पटक भएको फ्राञ्चाइज फुटबल प्रतियोगितामा स्पष्ट जित हात पारेका टोलीहरुलाई समेत खेलसँग अभ्यस्त हुन समय लागि रहेको छ । चितवनलाई आफ्नो पहिलो खेलमा पनि त्यही हुन सक्छ ।
अनुभवी भारतीय प्रशिक्षक यान ल ले सम्हालेको बिराटनगर सिटी एफसी अपवादको रुपमा देखिएको छ । बिराटनगरले आइतबार निकै नै संगठित फुटबलको नमुना प्रस्तुत गर्दै धनगढी एफसीलाई ३–० को फराकिलो अन्तरले पराजित गरेको थियो ।
मेघराज केसी घरेलु फुटबलमा त्यसरी नै संगठित फुटबल खेलाउन सक्ने प्रशिक्षकको रुपमा रहेका छन् । भरत खवास मार्की रहेको चितवन सोमबार ललितपुर बिरुद्ध मैदानमा उत्रदा केसीकै योजना अन्तर्गत खेल्नेछ ।
चितवनले भरतसँगै त्रिभुवन आर्मी फुटबल क्लबका चार खेलाडीलाई समावेश गरेको छ । आर्मीका युवा डिफेण्डर बिकास खवास चितवनका लागि सबैभन्दा ठूलो नाम हुन् भने मिडफिल्डमा टेक बहादुर बुढाथोकी अर्का अनुभवी आर्मी खेलाडी हुन् ।
फ्रेञ्च गोरान जेर्कोभिचसँै एल सैयद साबान र अहमद गबाला चितवनका तीन बिदेशी खेलाडीहरु हुन् तर सोमबार साँझ सबैको आखा नेपालमा पहिलो पटक प्रतिस्पर्धात्मक फुटबल खेल्न गइरहेका सुयान्सु भुषालमाथि हुनेछ ।
सुयान्सुलाई राष्ट्रिय टोलीका प्रशिक्षक अब्दुल्लाह अल्मुतईरीले कतारबाट सिधै राष्ट्रिय टोलीको ३२ जनाको क्याम्पमा बोलाएका छन् । प्रशिक्षक केसीले पनि उनको सराहना गरेका छन् तर उनी शुरुवाती ११ मा पर्ने नपर्ने बारे खुलेर बोलेका छैनन् । “उनको फुटबल सेन्स निकै राम्रो छ । नेपालको लागि उनी पछि गएर राम्रो खेलाडी बन्न सक्छन्,” केसीले प्रतियोगिता शुरु हुनु अघि भनेका थिए ।
ललितपुरका लागि क्रोएसियन भिलिम पोसिन्कोभिच, अजरबैजानका अनुभवी नुर्लान जाहीद र नेपाली फुटबलको अनुभव बटुलेका नाइजेरियन पिटर सेगुन बिदेशी खेलाडीको रुपमा रहेका छन् । पहिलो खेलमा प्रभाव जमाउन नसकेपछि उनीहरु नै चितवनको लागि प्रमुख हतियारको रुपमा रहने छन् । पिटर पहिलो खेलमा थिएनन् ।
