भारतमा प्रति दिन कोरोना भाइरसका साढे तीन लाख केसहरु आउन थाले पछि इण्डियन प्रिमियर लिगमा सहभागी अष्ट्रेलियन खेलाडीहरु प्रतियोगिता छोड्दै देश फर्कन थालेका छन् ।
राजस्थान रोयल्सका लागि खेल्दै आइरहेका तिब्र गतिका बलर एन्ड्रयु टाई आइतबार दोहा हुदै सिड्नी तर्फ लागे । अष्ट्रेलियन सरकारले भारतबाट आउट उडानहरुमा रोक लगाउन थालेपछि ३४ बर्षिय टाई आईपिएल छोडेर फर्किएका हुन् ।
टाइले आफूलाई अन्य अष्ट्रेलियन खेलाडीहरुले पनि उनले कसरी अष्ट्रेलियाको लागि फ्लाइट पाएको जानकारी लिन थालेको बताएका छन् । “म गएको थाहा पाएपछि धेरै खेलाडीहरुले मसँग सम्पर्क गर्दै आएका छन् । म अहिले नै सजिलै केही भन्न सक्दिन तर उनीहरु म सुरक्षित रहेको र आफ्नो लागि केही गर्न सकिन्छ की भन्दै सोचिरहेका छन्,” टाइले भने । सोमबार नै व्यक्तिगत कारण भन्दै लेग स्पिनर एडम जाम्पा र केन रिचर्ड्सनले पनि आईपिएलबाट नाम फिर्ता लिदै घर फर्किने निर्णय गरेका छन् ।
आईपिएलमा हाल स्टिभ स्मिथ, डेभिड वार्नर, प्याट कमिन्स लगायतका १६ अष्ट्रेलियन खेलाडीहरु आबद्ध रहेका छन् । यसमा प्रशिक्षकद्वय रिकी पोन्टिङ्ग र साइमन काटिचसँगै कमेन्टेटेरहरु म्याथ्यु हेडन, ब्रेट लि र माइकल स्लेटर पनि रहेका छन् ।
आइतबार क्रिकइन्फोले दुई अन्य अष्ट्रेलियन खेलाडीहरुले आफ्नो टिमलाई घर फर्कन चाहेको बताएका थिए । भारतीय स्टार स्पिनर रविचन्द्रन अश्विनले पनि कोभिड–१९ सँग लड्नका लागि दिल्ली क्यापिटल्स छोड्दै परिवारसँग रहने बताएका थिए ।
आइपिएल कडा स्वास्थ्य प्रोटोकोलसहितको बायो बबलमा दुई हप्ता देखि सञ्चालन हुदै आएको छ भने हालसम्म कुनै पनि खेलाडी र यससँग सम्बन्धितलाई कोरोना देखिएको छैन । चेन्नई र मुम्बइबाट शुरु भएको आईपिएलका खेलहरु अब दिल्लीमा पनि हुन गइरहेका छन् तर भारतीय राजधानी कोरोनाको केन्द्रबिन्दु बनिसकेको छ ।
सञ्चार माध्यमहरुका अनुसार कोरोनाका कारण भारतमा प्रत्येक चार मिनेटमा एक जनाको मृत्यु भइरहेको छ । आइतबार साढे तीन लाख संक्रमण दर्ता हुदा २७ सय ६७ को मृत्यु भएको थियो । तर यसको संख्या भने सोचेभन्दा निकै नै बढी रहेको मानिएको छ ।