बिराट कोहलीको रोयल च्यालेन्जर्स बैँगलोरलाई ६९ रनको फराकिलो अन्तरले पराजित गर्दै महेन्द्र सिँ धोनीको चेन्नई सुपर किंग्स इण्डियन प्रिमियर लिगको शिर्ष स्थानमा उक्लिएको छ ।
यसअघिको खेलमा १ सय ७८ रनको लक्ष्य पछ्याउने क्रममा राजस्थान रोयल्सलाई १० विकेटले हराएको बैँगलोरलाई रविन्द्र जडेजाले अलराउण्ड प्रदर्शन गर्दै माथ दिएका थिए ।
जडेजाले २८ बलमा ६२ रन बनाउदै चेन्नईलाई चार विकेटमा १ सय ९१ रनको बिशाल योगफलतर्फ डोर्याएका थिए । त्यसपछि मिडल अर्डरको तीन महत्वपूर्ण विकेट लिदा बैगलोरले २० ओभरमा ९ विकेटको क्षतिमा १ सय २२ रनमात्र बनाउन सक्यो ।
देवदत्त पडिक्कलले आकर्षक ब्याटिङ्गलाई निरन्तरता दिँदा बैँगलोरले पहिलो विकेटका लागि तीन ओभर भित्रै ४४ रन जोडेको थियो । तर १० रनको अन्तरमै कोहली (८) र पडिक्कल आउट भएपछि बैँगलोर धराशायी हुन पुगेको थियो । पडिक्कलले १५ बलमै चार चौका र दुई छक्काको मद्दतमा ३४ रन बनाएका थिए ।
जडेजाले त्यसपछि एबि डिभिलियर्स, ग्लेन म्याक्सवेल र वाशिँगटन सुन्दरको विकेट लएपछि बैँगलोर खेलमा फर्कन असफल रहेको थियो । जडेजाले चार ओभरमा मात्र १३ रन खर्चिएका थिए । जितपछि बैँगलोर र चेन्नईको शिर्ष स्थानमा समान १० अंक भएको छ । चेन्नईका लागि इम्रान ताहिरले पनि दुई विकेट लिएका थिए ।
यसअघि पहिलो ब्याटिङ्ग गरेको चेन्नईको लागि ओपनर रुतुाज गाइकवाड (३३) र फाफ डु प्लेसिले ७४ रन जोड्दै आकर्षक शुरुवात दिलाएका थिए । सुरेश रैनाले पनि २४ रन बनाउदा डु प्लेसिले पाँच चौका र एक छक्काको मद्दतमा ४१ बलमा ५० रन बनाए ।
त्यसपछि रैनाले आक्रमक ब्याटिङ्ग गर्दै चेन्नईलाई बिशाल योगफलतर्फ डोर्याए । जडेजाले पाँच छक्का र चार चौका प्रहार गरे । बैँगलोरका लागि हर्षल पटेलले तीन विकेट लिए ।
