आर्सनलका गोलकिपमर बन्र्ड लेनोले आत्मघाती गोल गर्दै जित उपहार दिएपछि एभर्टनका व्यवस्थापक कार्लो एन्सलोट्टीले आफ्नो टोलीले च्याम्पियन्स लिगको दाबेदारीको लागि पुनरागमन गरेको बताएका छन् ।
सबै प्रतियोगिता गरेर ६ खेलमा असफल रहेको एभर्टन आर्सनलमाथि १–० को जित हात पार्दै तीन अंक बटुल्न सफल भएपछि शिर्ष चार स्थानको लागि मात्र तीन अंकले पछाडी परेको छ । आर्सनलको एमिरेट्स स्टेडियमा बाहिर एक हजार भन्दा बढी समर्थकबाट क्लब मालिक स्ट्यान क्राऐकेको बिद्रोही युरोपियन सुपर लिग भुमिकाबिरुद्ध प्रदर्शन भएको दिन आर्सनल ७६ औं मिनेटमा पछि परेको थियो ।
रिचार्लिसनले ६ यार्ड नजिक दिएको पास लेनोले सचिलै समात्न सक्ने थिए तर बल उनको हातबाट फुस्कदै खुट्टामा लागेर आत्मघाती गोल हुन पुगेको थियो । सन् १९९६ पछि आर्सनललाई पहिलो पटक लिगमा एभर्टनले हराएको थियो ।
जिल्फी सिगुर्ड्सन गोल गर्न निकै नजिक थिए तर उनको ३० यार्ड लामो प्रहार पोस्टमा लागेर फर्किएको थियो । टेबलको टपमा नजिक रहनु हाम्रो लागि निकै राम्रो हो । आजको प्रदर्शन निकै राम्रो थियो र हामीलाई अर्को खेलमा पूर्ण आत्मबिश्वास दिन सक्नेछ । म हामी फर्किएको छौं भन्न सक्छु, एन्सलोट्टीले भने ।
आर्सनलको लागि भने अर्को सिजनको च्याम्पियन्स लिग प्रवेश गर्ने एउटै आधार युरोपा लिग बनेको छ । युरोपा लिग जित्ने हो भने मिकेल आर्टेटाको टोली युरोपको सबैभन्दा ठूलो क्लब प्रतिस्पर्धाका लागि छनोट हुनेछ ।
आर्सनल ४६ अंकका साथ नवौं स्थानमा छ भने चौथो र पाचौं स्थानमा रहेको चेल्सी र वेष्ट ह्यामको समान ५५ अंक छ । टोटेन्ह्याम र लिभरपुलको समान ५३ र एभर्टनको ५२ अंक छ । लेस्टर सिटी ५९ अंकसाथ तेश्रो स्थानमा छ ।
लिगको पछिल्लो चार सिजनमा तेश्रो उपाधि नजिक रहेको म्यानचेस्टर सिटीको ७७ अंक छ । एक खेल कम खेलेको म्यानचेस्टर युनाइटेडको ६६ अंक छ ।
