मलेसियाबिरुद्ध हुने त्रिदेशीय ट्वान्टी ट्वान्टी अन्तर्राष्ट्रिय श्रृंखला अन्तर्गतको अन्तिम लिग खेलमा नेपालबाट मिडियम पेस बलर कमल सिँह ऐरिले डेब्यु गर्ने भएका छन् ।
अहिले केही बेरमा शुरु हुन गइरहेको खेलमा कमललाई ट्वान्टी ट्वान्टी अन्तर्राष्ट्रियको डेब्यु क्याप दिइएको हो । कमललाई नेपाली क्रिकेट टोलीका व्यवस्थापक प्रकाश पौडेलले डेब्यु क्याप थमाएका हुन् ।
नेपालका लागि यो श्रृंखलाबाट चार जना युवा खेलाडीले डेब्युको मौका पाएका छन् । नेदरल्याण्ड्सबिरुद्धको पहिलो खेलबाट कुशल भुर्तेल, शाहब आलम र आसिफ शेखले डेब्यु गरेका थिए । कमलले कसको स्थान लिएका हुन् यो भने खुलेको छैन ।
नेपाल यसअघि नै फाइनल प्रवेश गरिसकेका कारण आजको खेलमा परिवर्तनको अपेक्षा गरिएको थियो ।
कमलले राष्ट्रिय टोलीबाट नै डेब्यु गरिसकेका छन् । उनले जनवरी, २०२० मा नेपालमै भएको आईसिसि बिश्वकप क्रिकेट लिग टु अन्तर्गत ओमान र अमेरिका सम्मिलित ट्राई सिरिजबाट राष्ट्रिय टोलीका लागि पहिलो खेल खेलेका थिए ।
ओमानबिरुद्ध खेलेका कमलको त्यो नै नेपाली टोलीका लागि एक मात्र खेल हो । नेपालले पहिलो खेलमा मलेसियालाई ९ विकेटको फराकिलो अन्तरले पराजित गरेको थियो । मलेसियाले नेदरल्याण्ड्सबिरुद्धको पहिलो खेलमा हारको सामना गरेको थियो भने दोश्रोमा बुधबार बराबरी गरेको थियो ।