म्यानचेस्टर सिटी एस्टन भिल्लालाई अवे खेलमा २–१ ले पराजित गर्दै प्रिमियर लिगको उपाधि नजिक पुग्दा व्यवस्थापक पेप ग्वार्डियोलाले असफल युरोपियन सुपर लिगको अध्याय अब समाप्त भइसकेको बताएका छन् ।
बिद्रोही सुपर लिगमा खेल्नको लागि सहमति जनाउने सिटी १२ मध्येको एक क्लब थियो तर व्यापक आलोचना र युरोपियन र बिश्व फुटबलको सर्वोच्च निकायले कडा रुपमा प्रस्तुत भएपछि सबै क्लबले यसबाट हात झिक्दा प्रतियोगिता गर्भमै तुहिन पुगेको थियो ।
“क्लबको रुपमा हामी गल्ति स्विकार्दै अघि बढ्नतर्फ केन्दित छौं । यो समाप्त भइसकेको अध्याय हो,” लिगमा बाकी रहेका ५ खेलबाट मात्र ८ अंक बटुले च्याम्पियन बन्न पर्याप्त हुने सिटी व्यवस्थापक ग्वार्डियोलाले भने ।
सिटीले लिगमा दोश्रो स्थानको म्यानचेस्टर युनाइटेडसँग ११ अंकको स्पष्ट अग्रता बनाएको छ । खेलमा भिल्लाले २० सेकेण्डमै जोन म्याकगिनको गोलमार्फत अग्रता लिएको थियो तर फिल फोडेनले २२ र रोद्रीले ४० औं मिनेटमा गोल गरेपछि सिटीले अग्रता उल्टाएको थियो ।
४४ औं मिनेटमा जोन स्टोन्सले जेकब राम्सीमाथि घातक फउल गरेपछि सिटी १० खेलाडीमा सिमित भएको थियो । भिल्लाले भने त्यसको सदुपयोग गर्न सकेन । भिल्लाले ५७ औं मिनेटमा म्याटी क्यासलाई दोहोरो पहेलको कार्डपछि गुमाएको थियो । भिल्ला ४४ अंक सहित ११ औं स्थानमा छ ।
बुधबार राति नै सन हिउङ मिनले अन्तिम समयको पेनाल्टीमा टोटेन्ह्यामले हटस्पर साउथ्याम्प्टनलाई २–१ ले पराजित गरेपछि नयाँ अन्तरिम प्रशिक्षक रायन मेसन जितका साथ शुरुवात गरेका छन् ।
२९ बर्षको उमेरमा प्रिमियर लिगकै सबैभन्दा कान्छा व्यवस्थापक पुर्व स्पर्स मिडफिल्डर मेसनले गत सोमबार होजे माउरिन्होको स्थान लिएका थिए । जितपछि स्पर्स गोल अन्तरका आधारमा ५३ अंक सहित छैटौं स्थानमा उक्लिदै लिभरपुललाई पछाडी धकेल्न सफल भएको छ । यद्दपि लिभरपुलको हातमा एक खेल अझै बाकी रहेको छ ।
ड्यानी इँग्सले जेम्स वार्ड–प्राउजको कर्नरमा गोल गरेपछि स्पर्स पहिलो आधा घण्टामै खेलमा पछि परेको थियो । तर ग्यारेल बेलले ६० औं मिनेटमा उत्कृष्ट कर्लिङ्ग गोल गर्दै खेललाई बराबरीमा ल्याए भने दक्षिण कोरियन स्टार सनले ९० औं मिनेटमा पेनाल्टीमार्फत गोल गरेका थिए ।
मुसा जेनेपोले ह्यारी विंक्सलाई लडाएपछि भिडियो असिस्टेन्ट रेफ्रिको सहयोगमा स्पर्सलाई पेनाल्टी दिइएको थियो । हारपछि गत सिजन सम्मानजनक प्रदर्शन गरेको साउथ्याम्प्टन यो सिजन भने १४ औं स्थानमा झरिसकेको छ ।
