शनिबार देखि दशरथ रँगशालामा आयोजना हुन गइरहेको नेपालको पहिलो फ्राञ्चाइज फुटबल प्रतियोगिता नेपाल सुपर लिगको अफिसियल मेडिकल पार्टनरको रुपमा नर्भिक इन्टरनेशनल हस्पिटल रहने भएको छ ।
एनएसएल तर्फबाट नेपाल स्पोर्टस एण्ड इभेन्ट्स म्यानेजमेन्ट र नर्भिक अस्पतालबीच अफिसियल मेडिकल पार्टनर सम्झौतामा हस्ताक्षर भएको हो ।
सम्झौतामा नर्भिकको तर्फबाट प्रबन्ध निर्देशक मेघा चौधरी र नेपाल स्पोर्टस एण्ड इभेन्ट्स म्यानेजमेन्टको तर्फबाट सो कम्पनीका डिरेक्टर श्रेयांश कार्कीले हस्ताक्षर गरेका थिए ।
कोरोना भाइरसको दोश्रो लहर नेपालमा पनि बढ्दै गएपनि नेपाल सुपर लिग बन्द रँगशालामा हुन गइरहेको छ । प्रतियोगिता अवधिभर दशरथ रंगशालामा उपस्थित खेलाडी, आयोजकका सदस्यमा देखा पर्नसक्ने कुनै आपातकालीन स्वास्थ्य समस्या समाधानका लागि नर्भिकको तर्फबाट ३ मेडिकल अफिसरसहितको टिम मैदानमै रहने एनएसएलले जनाएको छ ।
नर्भिकले प्रतियोगिता दौरान खेलाडी तथा आयोजकका कुनै सदस्यको पीसीआर टेस्ट गर्न परे विशेष छुटमा गर्नेछ ।