कुशल भुर्तेलले डेब्युमै लगातार तीन अद्र्धशतक प्रहार गर्ने बिश्व किर्तिमान कायम गर्नुका साथै दिपेन्द्र सिँह ऐरिले पहिलो ट्वान्टी ट्वान्टी अन्तर्राष्ट्रिय अद्र्धशतक बनाउदा नेपालले त्रिदेशीय ट्वान्टी ट्वान्टी अन्तर्राष्ट्रिय श्रृंखलामा नेदरल्याण्ड्सलाई २ सय ७ रनको बिशाल लक्ष्य दिएको छ ।
दर्शकलाई प्रवेश नदिइएको त्रिवि मैदानमा नेपालले ६ विकेटको क्षतिमा २ सय ६ रन बनायो । यो श्रृंखलामा पहिलो पटक कुशल र आसिफ शेखको साझेदारी नबनेपनि नेपालले नेदरल्याण्ड्सबिरुद्धको अहिलेसम्मकै सर्वाधिक योगफल बनायो । यस क्रममा कुलशले ४१ बलमा ६२ र दिपेन्द्रले ३० बलमै ६० रन ठोकेका थिए ।
कुशल ट्वान्टी ट्वान्टी अन्तर्राष्ट्रिय डेब्युमा लगातार तीन अद्र्धशतक बनाउने बिश्वकै पहिलो खेलाडी बने । उनले इङ्गल्याण्डका डेविड मलनको किर्तिमान तोडेका हुन् । मलनले डेब्यु प्रतियोगितामा लगातार दुई अद्र्धशतक प्रहार गरेका थिए ।
नेपालले दोश्रो ओभर भित्रै २० रन जोड्दा आसिफलाई शुन्यमै गुमाएको थियो । कुशलले सधै जसरी आक्रमक शुरुवात नै दिलाएका थिए । त्यसपछि कप्तान ज्ञानेन्द्र मल्ल र कुशलले दोश्रो विकेटका लागि ४३ रन जोडेका थिए ।
ज्ञानेन्द्रले १४ बलमा दुई चौका र एक छक्काको मद्दतमा २० रन बनाए । दिपेन्द्र र कुशलले नेपालका लागि महत्वपूर्ण साझेदारी गर्दै तेश्रो विकेटका लागि ७८ रन जोडेका थिए । दिपेन्द्रले निकै आक्रमक इनिङ्गस खेल्दा कुशल अद्र्धशतक नजिक पुगेपछि सम्हालिएर खेल्न थाले । उनले फ्रि हिटमा छक्का प्रहार गर्दै अद्र्धशतक पुरा गरेका ।
कुशलको इनिङ्गसमा ८ चौका र एक छक्का सामेल थियो । दिपेन्द्रले २८ बलमै अद्र्धशतक ठोकेका थिए । उनले नेदरल्याण्ड्स कप्तान पिटर सिलारलाई छक्का प्रहार गरेका दिपेन्द्र लगातार तीन छक्का हान्ने धुनमा आउट भए ।
कुशल मल्ले ७ बलमा १८ रन बनाउदा सबै रन छक्काबाटै बटुलेपछि नेपाल बिशाल योगफलतर्फ अग्रसर भएको थियो । नेपालले कुशल र करण केसीलाई दुई रनको अन्तरमा गुमाएपछि अन्तिम ओभर तिर नेदरल्याण्ड्सले इनिङ्गसमा नियन्त्रण राख्न सफल भएको थियो ।
अन्तिम ओभरमा नेपालले १२ रन जोडेको थियो । सोमपाल कामीले १३ बलमा दुई चौका र एक छक्काको मद्दतमा २१ रन बनाए ।
