दिल्ली माथि राजस्थानको रोमान्चक जित

दिल्ली क्यापिटल्स माथि तीन विकेटको रोमान्चक जित निकाल्दै राजस्थान रोयल्सले १४ औं संस्करणको इन्डियन प्रिमियर लिग (आईपीएल) मा आफ्नो पहिलो जित दर्ता गराएको छ ।

दिल्लीले दिएको १४८ रनको लक्ष्य राजस्थानले सात विकेट गुमाएर दुई बल अगावै जित दर्ता गराएको हो ।

३६ रनको अवस्थामा चार विकेट गुमाएर खराब सुरुवात गरेको राजस्थानको जितमा डेभिड मिल्लरले ४३ बल खेल्दै सर्वाधिक ६२ रन बनाए भने क्रिस मोरिसले १८ बलमा अविजित ३६ रनको पारी खेले ।

राजस्थानलाई दबाबमा राख्दै अभेश खानले सर्वाधिक तीन तथा क्रिस वक्स र कागिसो रबाडाले सामना २-२ विकेट हात पारे पनि दिल्लीलाई जित भने दिलाउन सकेनन् ।

यस अघि खेलमा टस हारेर पहिले ब्याटिङ गरेको दिल्लीले खराब सुरुवात गरे पनि कप्तान रिशब पन्तको अर्धशतकको मद्धतमा पुरै २० ओभर खेल्दै आठ विकेटको नोक्सानीमा १४७ रन मात्र बनाउन सक्यो ।

ओपनरद्वय पृथ्वी श र शिखर धवन क्रमश दुई र नौं रनमा, अजिंक्य रहाने आठ रनमा र मार्कस स्टोइनिस शुन्य रनमा आउट भए पनि कप्तान पन्तले ५१ रन प्रहार गर्दै दिल्लीको पारी सम्हालेका थिए । ३२ बलको सामना गरेका पन्तले नौं चौका प्रहार गरे ।

पन्त बाहेक दिल्लीको लागि टम कर्रनले २१, ललित यादवले २० तथा क्रिस वक्सले अविजित १५ रनको योगदान दिए ।

राजस्थानका जयदेव उनादकटले चार ओभरमा १५ रन खर्चिएर सर्वाधिक तीन विकेट लिए भने मुस्तफिजुर रहमानले पनि आफ्नो नाममा दुई विकेट दर्ता गराए ।