नेपाल क्रिकेट संघले बैशाख ४ देखि ११ सम्म त्रिवि क्रिकेट मैदानमा हुने नेपाल, मलेशिया र नेदरल्याण्ड्स सम्मिलित ट्वान्टी ट्वान्टी अन्तर्राष्ट्रिय ट्राइ सिरिजका लागि १५ सदस्यीय टोली घोषणा गरेको छ ।
तिब्र गतिका बलर सोमपाल कामी र ओपनर आशिफ शेखले नेपालको लागि पुनरागमन गर्ने अवसर पाएका छन् भने शाहब आलमले पहिलो पटक राष्ट्रिय टोलीमा स्थान बनाएका छन् ।
ढाँडको समस्याका कारण सोमपाल नेपालमा डिसेम्बर, २०१९ मा भएको दक्षिण एसियाली खेलकुददेखि नै टिममा छैनन् भने यस क्रममा उनले आईसिसि क्रिकेट बिश्वकप लिग टु र थाइल्याण्डको क्वाफिायर पनि छुट्टाएका थिए
त्यस्तै आसिफले करिब चार बर्ष पछि टोलीमा स्थान बनाउन सफल भएका छन् । उनले पछिल्लो पटक नेपालको लागि सन् २०१७ मा बंगलादेशमा आयोजना भएको इमर्जिङ टिम्स कपमा खेलेका थिए ।
आगामी शनिबारबाट सुरु हुने शृंखलाको उद्घाटन खेलमा घरेलु टोली नेपालले नेदरल्यान्ड्सको सामना गर्नेछ । समुह चरणमा सबै टोलीले एक अर्कासँग २-२ खेल खेल्ने छन् र शिर्ष दुई स्थान हात पार्ने टोलीले उपाधिका लागि बैशाख ११ मा भिड्ने छन् ।