हैदराबाद माथि कोलकाताको रोमान्चक जित

१४ औं संस्करणको इन्डियन प्रिमियर लिग (आईपीएल) को तेश्रो दिनको खेलमा कोलकाता नाइट राईडर्सले सनराइजर्स हैदराबाद माथि १० रनको रोमान्चक जित हात पारेको छ ।

खेलमा टस हारेर पहिले ब्याटिङ गरेको कोलकाताले २० ओभरमा छ विकेट गुमाएर १८७ रन बनायो भने १८८ रनको विजयी लक्ष्य सहित ब्याटिङमा आएको हैदराबादले पुरै २० ओभर खेल्दै पाँच विकेटको नोक्सानीमा १७७ रन मात्र बनाउन सक्यो ।

कोलकाताको तर्फबाट नितिश राना र राहुल त्रिपाठीले अर्धशतकीय पारी खेले । ५६ बलको सामना गरेका रानाले नौं चौका र चार छक्का प्रहार गरे भने त्रिपाठीले मात्र २९ बल खेल्दै पाँच चौका र दुई छक्का प्रहार गरे ।

त्यस बाहेक कोलकाताको लागि विकेट किपर ब्याट्सम्यान दिनेश कार्तिकले नौं बलमा २२ रन तथा शुबमन गिलले १५ रनको योगदान दिए भने अन्य ब्याट्सम्यानले दोहोरो अंकमा रन जोड्न सकेनन् ।

हैदराबादका रशिद खान र मोहम्मद नाबीले ४-४ ओभर बलिङ गर्दै समान २-२ विकेट आफ्नो नाममा लेखाए ।

विशाल लक्ष्य सहित ब्याटिङमा आएको हैदराबादले ओपनरद्वय रिद्धिमन साह र कप्तान डेभिड वार्नर क्रमश सात र तीन रनमा आउट हुँदा खराब सुरुवात गरे पनि तेश्रो नम्बरमा ब्याटिङ गर्न आएका मनिष पाण्डे र जोनी बैरस्टो ९२ रनको साझेदारी गर्दै पारी सम्हाल्ने प्रयास गरे ।

४० बल खेल्दै पाँच चौका र तीन छक्काको मद्धतमा ५५ रन बनाएका बैरस्टो प्याट कमिन्सको शिकार बन्न पुगे । पाण्डेले अर्को एक छोडबाट ४४ बलको सामना गर्दै अविजित ६१ रन बनाए पनि अर्को छोडबाट लगातार विकेट गुमाउँदा हैदराबादले हारको सामना गर्न पुग्यो ।

कोलकाताका प्रशिद कृष्णाले महँगो साबित भए पनि सर्वाधिक दुई विकेट आफ्नो नाममा लेखाउन सफल भए ।