नेपाल सुपर लिग टोली पोखरा थण्डर्सले आफ्ना प्रमुख खेलाडी सुजल श्रेष्ठलाई गुमाएपछि उनको स्थानमा अर्का राष्ट्रिय टोलीका खेलाडी रवि पासवानलाई ल्याएको छ ।
२०१९ डिसेम्बरमा नेपालमै भएको दक्षिण एसियाली खेलकुदमा बोकेको ग्रोइन इन्जुरीको समस्या फेरि दोहोरिदा सुजल चार हप्ताको लागि मैदाना बाहिर रहने भएका हुन् । सुजलले त्यही चोटका कारण नै नेपालमै भएको थ्रि नेसन्स कपमा पूर्ण रुपमा खेल्न पाएका थिएनन् ।
रविले भने किर्गिस्तान अण्डर–२३ र बङ्गलादेशबिरुद्धको पहिलो दुई खेलमा टोलीको लागि शुरुवात नै गरेका थिए । उनले तीनवटै खेलमा सहभागिता जनाएका थिए । “डक्टरले सुजललाई रिकभर हुन कम्तिमा पनि चार हप्ता लाग्ने बताएपछि हामीले रविलाई ल्याएका हौं । रवि राष्ट्रिय टोलीबाट पनि खेल्दै आएका छन् र उनी सुजलको ठाँउ लिन सक्छन्,” पोखरा थण्डर्सका प्रशिक्षक नविन न्यौपानेले विस्पोर्ट्जलाई बताए ।
“सुजल हाम्रो लागि राम्रो खेलाडीहरु मध्ये पर्छन् तर उनी पूर्ण रुपमा ठिक नहुञ्जेल हामीले टिममा राखिराख्ने कुरा पनि हुदैन । उनको अनुपस्थितिमा पनि टिमको सन्तुलन बिग्रन नदिनेमा हामी बिश्वस्त छौं,” न्यौपानेले भने ।
रवि अक्सनमा अनसोल्ड भएका सबैभन्दा ठूलो मध्ये एक नाम थिए । पोखरासँगै एनएसएलमा सहभागी अन्य पाँच टोलीहरुले आफ्नो बिदेशी खेलाडीहरु सार्वजनिक गरेको छैन । बुटवल लुम्बिनी एफसीले भने केही दिन अघि आफ्नो तीन वटै बिदेशी खेलाडीलाई सार्वजनिक गरिसकेको छ ।
पोखरा र बुटवल बाहेक एनएसएलमा एफसी चितवन, धनगढी एफसी, काठमांडौ रेजर्स, बिराटनगर सिटी एफसी र ललितपुर सिटी एफसी रहेका छन् । एनएसएल बैशाख ११ देखि जेठ १ गतेसम्म दशरथ रँगशालामा हुन गइरहेको छ । प्रतियोगिता नेपालकै पहिलो र हालसम्म एक मात्र फ्रान्चाइज फुटबल प्रतियोगिता हो ।
