स्पेनिश महारथी एफसी बार्सिलोना पछिल्लो ट्रान्स्फर विन्डो देखी युवा स्टार खेलाडी एर्लिङ हालान्डलाई क्लब भित्र्याउन लागि परेको छ । गएको साता मात्र हालान्डका एजेन्ट मिनो रायोला र बुवा एल्फ-इङे हालान्डसँग बार्सिलोनाका अध्यक्ष योहान लापोर्टाले बार्ता पनि गरेका थिए ।
हाल बोरुसिया डर्ट्मण्डमा खेल्दै गरेका हालान्डको ‘रिलिज क्लज’ एक सय मिलियन युरो रहेको छ । लगतार हालान्डमा चासो देखाइरहेको बार्सिलोनालाई बोरुसिया डर्ट्मण्डले २०१७ मा औस्माने डेम्बेले किन्दा रहेको बाँकी खर्च पहिले तिर्न आग्रह गरेको स्पेनको चर्चित रेडियो मार्साले जनाएको छ ।
रेडियो मार्साका अनुसार लगातार हालान्डको एजेन्टसँग भेटघाट गरिरहेको बार्सिलोनालाई डर्ट्मण्डले हालान्डलाई आँखा लगाउनु अघि डेम्बेले किन्दाको बाँकी पैसा तिर्न आग्रह गरेको जनाएको छ ।
२०१७ मा बार्सिलोनाले डेम्बेलेलाई १ सय ४५ मिलियन युरोमा क्लब भित्र्याएको थियो । मार्साका अनुसार बार्सिलोनाले एक सय मिलियन अगाडी नै तिरे पनि ४५ मिलियनको बाँकी पैसा भने डर्ट्मण्डलाई बुझाउन बाँकी रहेको छ ।
डेम्बेलेले लगातार चोटका कारण धेरै खेलहरु गुमाए पनि बार्सिलोनाका लागि ७४ खेल खेल्दै १७ गोल गरिसकेका छन् ।
मार्साका अनुसार बार्सिलोनालाई डर्ट्मण्डले कैयौ पटक उक्त रकम बारे जानकारी गराइसकेको तर कमजोर आर्थिक स्थिती र पुर्व अध्यक्ष जोशेप मरिया बार्तोमेउ विवादमा फसे पछि बार्साले तिर्न सकेको थिएन ।
बार्सिलोना २०२१ मा ७ सय मिलियन युरो भन्दा धेरै ऋणमा रहेको छ । नयाँ अध्यक्षको पदमा आएका योहान लापोर्टाले क्लबलाई ऋण मुक्त बनाउने समर्थकहरुले आशा गरेका छन् ।
