सुन्दर साकोस हेटौडाका कृष्ण थापा, माउण्ट एभरेष्ट चेस एण्ड सोसियल क्लबका क्षितिज भण्डारी, दोलखाका सुमित पन्त, गजुरमुखी चेस क्लबका रिजेन्द्र राजभण्डारी, प्रकाश नेपाल र करुणामय साकोसका पूर्वनेपाल च्याम्पियन केशव श्रेष्ठले गणेशमान सिंह स्मृति आठौं सहकारी कप फिडे रेटिङ्ग बुद्धिचाल प्रतियोगितमा संयुक्त अग्रता लिएका छन् ।
तेश्रो चरणको समाप्तिसम्म शिर्ष स्थानमा रहेका खेलाडीहरुको समान ९ अंक रहेको छ । शिर्ष वरियताका खेलाडी फिडे मास्टर रुपेश जैसवाललाई नोभा साकोस ललितपुरका युवा खेलाडी सुदिप तामाङ्गले माथ गरे । सुदिपले तेश्रो चरणको खेलमा दोलखाका मिलन लामासित बराबरी खेलेका थिए ।
तामाङ्गसँगै जनता साकोस ललितपुरका सजिन महर्जन, दमकका राजन सुवेदी, सिलुलाइट साकोस लुभुका कमल श्रेष्ठ, सुरोज महर्जन र सद्भाव कृषि सहकारी लुभुका अशोकमोहन श्रेष्ठ २ जीत र एक बराबरी खेली ७ अंकका साथ संयुक्तरुपमा दोश्रो स्थानमा छन् ।
६४औं सहकारी दिवसको उपलक्ष्यमा आयोजित प्रतियोगितामा ९० जना खेलाडीहरु प्रतिस्पर्धा गर्दैछन् । पाँचदिने प्रतियोगिताका विजेताले यामाहा मोटरसाइकल, उपविजेताले नगद ६० हजार हात पार्नेछन् भने कुल नगद पुरस्कार रु.५,६१,४०० रहेको छ ।
