आफ्ना स्टार खेलाडीहरु चम्किएपछि बिश्व नम्बर एक टोली बेल्जियम वेल्सलाई ३–१ ले पराजित गर्दै २०१६ युरो कपको क्वार्टर–फाइनल बदला पुरा गर्न सफल भएको छ ।
युरो कपमा वेल्सले एक गोलले पछि परेको स्थितिमा ३–१ को जित रच्दै बेल्जियमलाई क्वार्टर–फाइनलबाट घर पठाएको थियो । आफ्नो फुटबल इतिहासकै सबैभन्दा ठूलो उपलब्धि हात पार्ने क्रममा वेल्स उक्त युरोको सेमिफाइनलसम्म प्रवेश गरेको थियो ।
बुधबार घरेलु मैदानमा बेल्जियमले त्यही किसिमको परिणाम निकाल्यो । ह्यारी विल्सनले उत्कृष्ट टिम प्रयासलाई फिनिसिङ्ग दिने क्रममा ११ औं मिनेटमा नै वेल्सलाई अग्रता दिलाएका थिए । तर त्यसपछि बेल्जियम खेलमा हावी भयो ।
२२ औं मिनेटमा बिश्वकै उत्कृष्ट मिडफिल्डर मानिएका केभिन डि ब्रुनले पेनाल्टी बक्सबाहिर बाट गरिएको सटिक प्रहारमा बराबरी गोल गरे । ६ मिनेटपछि कोनोर रोबर्ट्स चिप्लिदा थोमस मुनियरको क्रसमा थोर्गन हजार्डले सहज डेडरमा गोल गरेपछि वेल्स अभागी साबित भएको थियो ।
क्रिस मेफामले बक्स भित्र ड्रायस मेर्टेन्सलाई लडाएपछि प्राप्त पेनाल्टीमा रोमेलु लुकाकुले ७३ औं मिनेटमा गोल गर्दै बेल्जियमको जित सुनिश्चित गरेका थिए । लुकाकुले बेल्जियमका लागि ९० खेलबाट ५८ गोल गरिसकेका छन् ।
शनिबार मेक्सिकोसँग मैत्रीपूर्ण अन्तर्राष्ट्रिय खेल्न गइरहेको बेल्जियमले मङ्गलवारको महत्वपूर्ण खेलमा चेक रिपब्लिकको सामना गर्नेछ । चेक रिपब्लिकले बुधबार नै भएको खेलमा इस्टोनियालाई ६–२ को बिशाल अन्तरले पराजित गर्यो । बेल्जियमले चेकसँग अवे खेलमा अर्को शनिबार खेल्नेछ ।
बुधबार नै भएको अर्को खेलमा पोर्चुगलले आत्मघाती गोलपछि अजरबैजानमाथि १–० को सांघुरो जित दर्ता गर्यो । नर्वेले जिब्रल्टारलाई ३–० ले हरायो ।
युरो कप अन्तर्गत बुधबारको परिणामहरु
समुह ए
पोर्चुगल १–० अजरबैजान
सर्बिया २–० रिपब्लिक अफ आयरल्याण्ड
समुह डी
फिनल्याण्ड २–२ बोस्निया हर्जगोभिना
फ्रान्स १–१ युक्रेन
समुह इ
बेल्जियम ३–१ वेल्स
इस्टोनिया २–६ चेक रिपब्लिक
समुह जी
टर्की ४–२ नेदरल्याण्ड्स
जिब्रल्टार ०–३ नर्वे
लाट्भिया १–२ मोन्टेनेग्रो
समुह एच
साइप्रस ०–० स्लोभाकिया
माल्टा १–३ रुस
स्लोभेनिया १–० क्रोएसिया