एवर्टनका प्रशिक्षक कर्लो एन्जोलोटीले आफ्नो टोली प्रिमियर लिगको शिर्ष स्थानको टोली म्यानचेस्टर सिटीसँग एफए कपमा पराजित भए पछि सिटी संसारकै उत्कृष्ट टोली भएको बताएका छन् ।
मर्सीसाइड टोलीले सिटीलाई गूड्इसन पार्कमा ८० मिनेट रोके पनि त्यस पछि भने गोल खान पुगेको थियो । इकाए गुन्डोवान र केवेन डि ब्रुनले अन्तिम समयमा गोल गरे पछि सिटी २-० ले बिजयी पनि भएको थियो ।
सिटीले एफए कपको क्वार्टरफाइनलमा एवर्टनलाई हराएसँगै ‘क्वाड्रुपल’ जित्ने सपनालाई पनि जिवितै राखेको छ ।
“हामी जितको धेरै नजिक थियौँ शायद ८० मिनेट त हामीले सिटीलाई रोकेकै हो तर त्यसपछि भने खेल हाम्रो हातबाट निस्किन पुग्यो,” एन्जोलोटीले भने ।
“हामी पराजित भयौँ मलाई यस्मा कुनै पनि पछुतो छैन किन कि सिटी अहिले विश्वकै उत्कृष्ट टिम हो,” उनले थपे ।
“म अझै पनि भन्छु उनीहरूको विश्वमा सबै भन्दा राम्रो बेन्च छ । यो हाम्रोलागि राम्रो अनुभव रह्यो र हामी पराजित भए पनि अहिले कुनै पछुतो छैन,”
“पछुतो भएको खेल भनेको बर्नली र फुलहमको बिरूद्धको खेल हो, तर हामी ठीक स्थानमै छौं । लिगमा हामीसँग १० खेल बाँकी नै छ र हामी अर्को सीजन युरोपमा आफ्नो स्थानका लागि लड्न चाहन्छौं।” उनले भने ।