इङ्गल्याण्डलाई चौथो तथा अन्तिम टेस्टमा एक इनिङ्गस २५ रनले पराजित गर्दै भारतले चार म्याचको टेस्ट श्रृंखला ३–१ ले आफ्नो पक्षमा पारेको छ ।
अहमदाबादमा तेश्रो दिन पहिलो इनिङ्गसमा ३ सय ६५ रन बनाउदै १ सय ५५ रनको अग्रता लिएको भारतले इङ्गल्याण्डलाई दोश्रो इनिङ्गसमा १ सय ३५ रनमै अल आउट गर्दै फराकिलो जित हात पार्यो ।
जितसँगै भारतले जुनमा हुने वल्र्ड टेस्ट च्याम्पियनसिपको फाइलमा न्युजिल्याण्डसँगको भेट पक्का गरेको छ । फाइनलको दौडबाट यसअघि नै बाहिरिसकेको इङ्गल्याण्डले जितेको खण्डमा अष्ट्रेलियाले स्थान बनाउने थियो ।
दोश्रो इनिङ्गसमा पाचौ ओभरदेखि विकेट गुमाउन थालेको इङ्गल्याण्डलाई एक पटक फेरि भारतीय स्पिनरहरुले नै दवाबमा राखेका थिए । अक्षर र रविचन्द्रन अश्विनले तीन–तीन विकेट लिएपछि इङ्गल्याण्डले मात्र ६५ रनमै पहिलो ६ विकेट गुमाएको थियो ।
ड्यान लरेन्सले सातौं विकेटका लागि बेन फोक्ससँग ४४ रनको साझेदारी गर्दै पाहुना टोलीलाई केही सम्मानजनक योगफलतर्फ धकेलेका थिए । अन्तिम ब्याट्स्म्यानको रुपमा आउट भएका लरेन्सले इङ्गल्याण्डका लागि सर्वाधिक ५० रन बनाए ।
अश्विन र अक्षरले समान पाँच विकेट लिएका थिए ।
तेश्रो दिन ७ विकेटको क्षतिमा २ सय ९४ रनबाट अघि खेल्न शुरु गरेको भारतले वाशिँगटन सुन्दरको शान्दार इनिङ्गसको मद्दतमा सबै विकेट गुमाई ३ सय ६५ रन बनायो । आठौं विकेटका लागि अक्षर पटेलसँग १ सय ६ रनको साझेदारी गरेका वाशिँगटनले नटआउट ९६ रन बनाए ।
उनले १ सय ७४ बलको सामना गर्दै १० चौका र एक छक्का प्रहार गरेका थिए । अक्षरले ९७ बलमा ४३ रन बनाए । इङ्गल्याण्डका लागि बेन स्टोक्सले चार, जेम्स एन्डरसनले तीन र ज्याक लिचले दुई विकेट लिएका थिए ।
