४१ बर्षिय आक्रमक ब्याट्सम्यान क्रिस गेल र ३९ बर्षिय तिब्र गतिका बलर फिडेल एडवार्डस्ले वेस्ट इन्डिज राष्ट्रिय टोलीमा पुनरागमन गरेका छन् । वेस्ट इन्डिज क्रिकेट बोर्डले श्रीलंका विरुद्धको तीन खेलको शृंखलाको लागि १४ सदस्यीय टोलीको नाम सार्वजनिक गर्दा गेल र एडवार्डस्लाई पनि टोलीमा स्थान दिएको हो ।
ट्वान्टी ट्वान्टीमा वेस्ट इन्डिजको लागि पछिल्लो पटक सन् २०१२ मा खेलेका एडवार्डस्ले नौं बर्ष पछि राष्ट्रिय टोलीमा पुनरागमन गरेका हुन् । उनले पछिल्लो पटक सन् २०१२ मा सम्पन्न ट्वान्टी ट्वान्टी विश्वकप अन्तर्गत श्रीलंका विरुद्धको खेलमा खेलेका थिए । यस अघि एडवार्डस्ले २० वटा ट्वान्टी ट्वान्टी अन्तर्राष्ट्रिय खेलमा १६ विकेट हात पारेका थिए ।
त्यस्तै गेलले भने दुई बर्ष पछि राष्ट्रिय टोलीमा स्थान बनाएका छन् । गेलले सन् २०१९ को मार्चमा इंग्ल्यान्ड विरुद्धको ट्वान्टी ट्वान्टी शृंखलामा वेस्ट इन्डिजको प्रतिनिधित्व गरेका थिए । ५८ खेल खेलेका गेलले १६ सय २७ रन बनाउनुको साथै १७ विकेट पनि लिएका थिए ।
‘हामी विश्वकपको उपाधि रक्षा गर्ने लक्ष्य सहित टोली निर्माण गर्दैछौं । त्यसैले हामी हाम्रो उत्कृस्ट टोली निर्माण गर्ने सोचले धेरै भन्दा धेरै खेलाडीलाई मौका दिएर हेर्न चाहन्छौं,’ मुख्य चयनकर्ता रोजर हार्परले बताए ।
वेस्ट इन्डिज र श्रीलंका बीचको तीन खेलको शृंखला मार्च तीन, पाँच र सात तरीकमा खेलिने छ ।
वेस्ट इन्डिज टोली :- किएरोन पोलार्ड, निकोलस पुरन, फाबियन एलेन, ड्वायन ब्राभो, फिडेल एडवार्डस्, आन्द्रे फ्लेचर, क्रिस गेल, जासन होल्डर, अकेल होसेन, एविन लेविस, ओबेड म्याकोय, रोवमन पावेल, लेन्डल सिमोन्स, केविन सिनक्लेयर
