जर्मन टोली बोरुसिया मोइन्चेनग्ल्याडब्याचबिरुद्ध २–० को सहज जित निकाल्दै आकर्षक खेल प्रदर्शन गरेपछि म्यानचेस्टर सिटी व्यवस्थापक पेप ग्वार्डियोलाले आफ्नो टोलीबाट अझै अपेक्षा गरेका छन् ।
बुधबार राति भएको च्याम्पियन्स लिग अन्तिम १६ को अवे खेलमा ग्ल्याडब्याचलाई सहज रुपमा पराजित गर्दै लगातार १९ औं जित निकाल्दै सिटीले एउटा खुट्टा प्रतियोगिताको क्वार्टर–फाइनलमा राखेको हो । बुडापेस्टमा सिटीका लागि बर्नार्डो सिल्भा र ग्याब्रियल जिजसले गोल गरेका थिए ।
तर सिटीले ठूलै गोल अन्तरले जित्नु पर्ने थियो । “हामीले खेल नियन्त्रणमा त लियौं तर हामी त्यति क्लिनिकल भने थिएनौं,” ग्वार्डियोलाले खेलपछि भने ।
“च्याम्पियन्स लिगमा हामी निकै सुधारिनु आवश्यक छ । अग्रपंक्तिमा हामीले पाएको मौकाहरुलाई शत प्रतिशत रुपमा परिणत गर्नु पर्नेछ । मौका खेर फाल्नु भनेको अर्को टोलीलाई अवसर दिनु हो,” ग्वार्डियोलाले भने ।
२९ औं मिनेटमा जाओ क्यान्सेलो क्रसमा सिल्भाले हेडरमार्फत सिटीलाई अग्रता दिलाएका थिए । त्यसपछि दुवै खेलाडी मिलेर जिजसको लागि ६२ औं मिनेटमा दोश्रो गोलको अवसर सृजना गरेका थिए ।
४३ बर्षमा पहिलो पटक च्याम्पियन्स लिगको प्रि–क्वार्टरफाइनलमा स्थान बनाएको ग्ल्याडब्याचले कुनै पनि समय सिटीलाई टक्कर दिन सकेको थिएन । म्यानचेस्टरमा हुने दोश्रो लेगका लागि उसले धेरै नै मिहिनेत गर्नु पर्ने देखिन्छ ।