श्रीलंकाको वेष्ट इण्डिज भ्रमणको लागि बलिङ्ग प्रशिक्षक नियुक्त भएको तीन दिन पछि नै लेजेण्डरी तिब्र गतिका पुर्व बलर चामिण्डा भासले आफ्नो पदबाट राजीनामा दिएका छन् ।
श्रीलंका क्रिकेटले भासलाई गत शुक्रबार मात्र बलिङ्ग प्रशिक्षकको रुपमा नियुक्त गरेको थियो । तर सोमबार श्रीलंकन टोली क्यारेबियनका लागि उड्नुभन्दा केही घण्टा अगाडी मात्र उनले मार्च २६, २०२१ देखि प्रभावकारी हुने गरि पदबाट राजीनामा दिएका हुन् ।
“सारा बिश्वले सामना गरिरहेको अहिलेको आर्थिक वातावरणमा आफ्नो नितान्त आर्थिक फाइदाको बारेमा मात्र सोच्दै एक्कासी र गैरजिम्मेवरी तरिकाले भासले राजिनामा दिनु दुखद कुरा हो,” श्रीलंका क्रिकेटले एक बिज्ञप्तिमा भनेको छ ।
बिज्ञप्तिका अनुसार भासले डिमान्ड गरे अनुसारको भत्ता दिन श्रीलंका क्रिकेट राजी नभएपछि उनले राजीनामा दिएका हुन् । श्रीलंका क्रिकेटले करारमा रहेपनि भासको अनुभव, बिज्ञता र योग्यतालाई मध्येनजर गर्दै नियमित रुपमा दिइनु पर्ने भत्ता भन्दा बढी नै दिइएको पनि बताएको छ ।
श्रीलंकाको हाई पर्फमेन्स सेन्टरको फास्ट बलिङ्ग प्रशिक्षक रहेका भासले राष्ट्रिय टोली तथा युवा खेलाडीहरुलाई प्रशिक्षण दिंदै आएका थिए । सन् २०१९ को अन्त्यमा नेपालमा आयोजना भएको १३ औं दक्षिण एसियाली खेलकुदमा भास श्रीलंका अण्डर–२३ टोलीका मुख्य प्रशिक्षक भएर पनि काम गरेका थिए ।
४७ बर्षिय भासले श्रीलंकाको लागि १११ टेस्टमा ३५५ तथा ३२२ एकदिवसीय खेलमा ४०० विकेट आफ्नो नाममा लेखाएका थिए । श्रीलंकाले सन् १९६६ मा विश्वकपको उपाधि जित्दाका सदस्य भासको नाममा अहिले पनि एकदिवसीयमा उत्कृस्ट बलिङ गर्ने किर्तिमान रहेको छ ।
उनले सन् २००१ मा जिम्बाब्वे विरुद्धको खेलमा आठ ओभर बलिङ गर्दै तीन मेडन ओभर सहित १९ रन खर्चिएर आठ विकेट हात पारेका थिए ।